الماتىدا «تازا قازاقستان» باعدارلاماسى اياسىندا قالالىق اۋماقتاردى ساندىك گۇلدەرمەن كورىكتەندىرۋ باعىتىندا كەشەندى جۇمىستار جۇرگىزىلۋدە. بۇل تۋرالى قالالىق ەكولوگيا جانە قورشاعان ورتا باسقارماسىنىڭ وكىلدەرى ايتتى، - دەپ حابارلايدى alnews.
2026 جىلى ساندىك گۇلدەرمەن كوگالداندىرىلاتىن اۋماقتىڭ جالپى كولەمى 387 953 شارشى مەتر بولدى، بۇل 2025 جىلمەن سالىستىرعاندا 77 پايىزعا ارتىق. ونىڭ 107 836 شارشى مەترى (28%) ءبىرجىلدىق گۇلزارلارعا، ال 280 117 شارشى مەترى (72%) كوپجىلدىق گۇلزارلار مەن گۇلدەيتىن ساندىك بۇتالارعا تيەسىلى. سونىمەن قاتار 9 844 تىك كوگالداندىرۋ ەلەمەنتىن ورنالاستىرۋ كوزدەلگەن.
گۇل كومپوزيسيالارى جۇرگىنشىلەر ايماقتارى بويىنا، ءىرى كوشەلەر مەن داڭعىلدارعا، سونداي-اق ساياباقتار مەن سكۆەرلەرگە وتىرعىزىلماق. اتالعان باعدارلاما قالانىڭ بارلىق اۋدانىن قامتىپ، قالالىق كەڭىستىكتى كوگالداندىرۋدا ءبىرىزدى، ۇيلەسىمدى ءتاسىل قالىپتاستىرۋعا باعىتتالعان.
باعدارلامانىڭ ماڭىزدى باعىتتارىنىڭ ءبىرى – كولىك جولايىرىقتارى، نەگىزگى كوشەلەر مەن بولگىش جولاقتاردى تىك كوگالداندىرۋ. بۇل قالالىق ينفراقۇرىلىمنىڭ كوركەمدىك كەلبەتىن جاقسارتىپ، ەكولوگيالىق تۇراقتىلىعىن ارتتىرۋعا ىقپال ەتەدى.
جوسپار اياسىندا ءبىرجىلدىق گۇل كوشەتتەرىنەن گۇلزارلار جاساۋ، راۋشان باقتارىن قالىپتاستىرۋ، ساندىك گۇلدەيتىن بۇتالاردى وتىرعىزۋ، قىزعالداق ەگۋ جانە ولاردى كۇتىپ-باپتاۋ جۇمىستارى جۇرگىزىلەدى.
اتالعان ءىس-شارالاردى جۇزەگە اسىرۋ قورشاعان ورتانىڭ جاعدايىن جاقسارتىپ، قالا تۇرعىندارى مەن قوناقتارى ءۇشىن جايلى دا كوركەم ورتا قالىپتاستىرۋعا مۇمكىندىك بەرەدى.
