الماتىدا ۇيالى بايلانىس، SIM-كارتا جانە ينتەرنەت بولماعان جاعدايدا دا ادامنىڭ ورنالاسقان جەرى تۋرالى مالىمەتتى قۇتقارۋشىلارعا جەتكىزۋگە مۇمكىندىك بەرەتىن SOS باتىرماسى بار AG Tag جەكە قۇرىلعىسىنا نەگىزدەلگەن قاۋىپسىزدىك جۇيەسى ازىرلەنىپ، سىناقتان وتكىزىلىپ جاتىر، - دەپ حابارلايدى alnews.
AG Digital KZ كومپانياسىنىڭ بۇل جوباسى الماتىنىڭ سيفرلاندىرۋ باسقارماسىنىڭ قاتىسۋىمەن جۇزەگە اسىرىلۋدا.
جاڭا قاۋىپسىزدىك جۇيەسى تاۋلى جانە جەتۋى قيىن ايماقتارداعى ىزدەستىرۋ-قۇتقارۋ جۇمىستارىنىڭ تيىمدىلىگىن ارتتىرۋعا باعىتتالعان. قۇتقارۋ قىزمەتتەرىنىڭ مالىمەتىنشە، جىل سايىن الماتى تاۋلارىندا 1 000-نان استام ىزدەستىرۋ-قۇتقارۋ جۇمىسى جۇرگىزىلەدى. الايدا كوپتەگەن تۋريستىك باعىتتا ۇيالى بايلانىس جەلىسىمەن قامتىلماعان اۋماقتار بار. بۇل كومەككە مۇقتاج ادامداردىڭ ناقتى ورنالاسقان جەرىن انىقتاۋدى قيىنداتادى.
AG Tag قۇرىلعىسى سپۋتنيكتىك ناۆيگاسيا ارقىلى ادامنىڭ كوورديناتتارىن وزدىگىنەن انىقتاپ، ولاردى راديوبايلانىس ارقىلى قۇتقارۋ قىزمەتىنىڭ بازالىق ستانسياسىنا جىبەرەدى. دەرەكتەر ءار ەكى سەكۋند سايىن جاڭارتىلىپ وتىرادى. ال توتەنشە جاعداي تۋىنداعان كەزدە تۋريست SOS باتىرماسىن ءبىر رەت باسۋ ارقىلى دابىل بەلگىسىن جىبەرە الادى. زارداپ شەككەن ادامنىڭ كوورديناتتارى جەدەل كەزەكشىنىڭ ەلەكتروندىق كارتاسىندا كورسەتىلەدى. قازىرگى كونفيگۋراسيادا سيگنال تاراتۋ قاشىقتىعى 15 شاقىرىمعا دەيىن جەتەدى.
جۇيە قۇرىلعىمەن بايلانىستىڭ جاي-كۇيىن باقىلاۋعا، سونداي-اق سيگنال جوعالعان جاعدايدا ونىڭ سوڭعى ورنالاسقان جەرىن تىركەۋگە مۇمكىندىك بەرەدى. بازالىق ستانسيا ينتەرنەتكە جانە ۇيالى جەلىلەرگە قوسىلماي-اق اۆتونومدى رەجيمدە جۇمىس ىستەي الادى.
جوبا اياسىندا تۋريستەرگە جابدىقتى eGov Mobile قوسىمشاسىنداعى QR-كود ارقىلى بەرۋ تەتىگى دە قاراستىرىلىپ جاتىر. ساپارعا شىعار الدىندا پايدالانۋشى باعىتىن جانە بولجامدى قايتۋ ۋاقىتىن تىركەپ، جەكە قۇرىلعىنى الا الادى. ال ساپار اياقتالعاننان كەيىن قۇرىلعىنى قايتارادى.
الماتىنىڭ نەگىزگى تۋريستىك باعىتتارىندا جابدىق بەرەتىن 12 پۋنكت اشۋ كوزدەلگەن. ولاردىڭ قاتارىندا الما-اراسان، ايۋساي، مەدەۋ، كىماسار، كوكجايلاۋ، بۇتاقتى جانە شىمبۇلاق بار.
بۇگىندە جۇيە الماتىنىڭ التى تاۋلى باعىتىندا، سونىڭ ىشىندە تۋريست، پانوراما، بۋكرەيەۆ جانە فۋرمانوۆ شىڭدارى مەن ۇلكەن الماتى كولى ماڭىندا سىناقتان ءوتتى. تەكسەرۋ جۇمىستارى ءارتۇرلى اۋا رايى جاعدايىندا، ونىڭ ىشىندە بيىك تاۋلى ايماقتاردا جۇرگىزىلدى.
سونىمەن قاتار الماتىنىڭ قۇتقارۋ قىزمەتىمەن جانە ق ر تجم رەسپۋبليكالىق جەدەل-قۇتقارۋ جاساعىمەن بىرلەسكەن سىناقتار وتكىزىلدى. سىناقتار ۇيالى بايلانىس جەلىسى جوق اۋماقتاردا دا جۇرگىزىلدى. تەكسەرۋ ناتيجەسىندە جۇيەنىڭ جۇمىس ىستەۋ قابىلەتى راستالدى. قازىرگى ۋاقىتتا ودان ءارى سىناقتان وتكىزۋ ءۇشىن قۇرىلعىلاردىڭ العاشقى پارتياسى دايىندالدى.
2026 جىلدىڭ سوڭىنا دەيىن الماتىنىڭ تۋريستەرى مەن الپينيستىك قاۋىمداستىقتارىنىڭ قاتىسۋىمەن پيلوتتىق سىناقتاردى باستاۋ جوسپارلانىپ وتىر. جوباعا الماتىنىڭ توتەنشە جاعدايلار دەپارتامەنتى، الپينيزم فەدەراسياسى جانە قالانىڭ ۆيزيت-ورتالىقتارى قاتىسادى.
الداعى ۋاقىتتا بۇل تەحنولوگيانى الماتى تاۋلارىندا عانا ەمەس، قازاقستاننىڭ باسقا دا تۋريستىك ايماقتارى مەن جەتۋى قيىن وڭىرلەرىندە قولدانۋ جوسپارلانىپ وتىر.
