الماتى تاۋ كلاستەرى جوباسىن جۇزەگە اسىرۋ پراكتيكالىق كەزەڭگە ءوتتى، - دەپ حابارلايدى alnews.
«Almaty Tau Management» ج ش س مالىمەتىنشە، دايىندىق جۇمىستارى «شىمبۇلاق» كۋرورتىندا، سونداي-اق بۇتاقتى جانە كىماسار شاتقالدارىندا باستالدى.
«شىمبۇلاقتا» ەكى جاڭا كوتەرگىش — ءتورت ورىندىق اسپالى جول مەن سۇيرەتپەلى كوتەرگىش سالىنىپ جاتىر. ولار كۋرورتتىڭ وتكىزۋ قابىلەتىن ارتتىرۋعا، كەلۋشىلەر سانىن ءتيىمدى بولۋگە جانە شاڭعى تەبۋ جايلىلىعىن جاقسارتۋعا مۇمكىندىك بەرەدى.
بۇتاقتى شاتقالىندا بولاشاق اسپالى جول ستانسيالارىنا ارنالعان الاڭدار دايىندالىپ، ينجەنەرلىك-گەولوگيالىق زەرتتەۋلەر جۇرگىزىلۋدە. قۇرىلىس تەحنيكاسىنىڭ ءجۇرۋى جانە ينجەنەرلىك جەلىلەردى تارتۋ ءۇشىن «بۇتاقتى – 2000 م» باعىتى بويىنشا تەحنولوگيالىق جول سالۋ جۇمىستارى باستالدى. بۇل نەگىزگى قۇرىلىس-مونتاج جۇمىستارىنا كىرىسپەس بۇرىن اتقارىلاتىن قاجەتتى كەزەڭ. ول شامامەن 2–3 اپتاعا سوزىلادى.
كىماسار شاتقالىندا بولاشاق بازالىق ستانسيا ورنالاساتىن قۇرىلىس الاڭى دايىندالدى. بارلىق ۋچاسكەدە جاسىل جەلەكتەر زەرتتەلىپ جاتىر. ماماندار اعاشتاردىڭ قازىرگى جاعدايى مەن ورنالاسۋىن تىركەپ، كەيىنگى جوبالاۋ كەزىندە تابيعي لاندشافتتى ەسكەرۋگە جانە وعان اسەردى بارىنشا ازايتۋعا ءمان بەرەدى. اعاشتاردى تاڭبالاۋ — ولاردى زەرتتەۋ جانە ەسەپكە الۋ ءراسىمىنىڭ ءبىر بولىگى.
ەسكە سالايىق، الماتى تاۋ كلاستەرى «شىمبۇلاق» پەن «Oi-Qaragai» كۋرورتتارىن اسپالى جولدار مەن تاۋ شاڭعىسى تراسسالارىنىڭ ءبىرىڭعاي جۇيەسى ارقىلى بىرىكتىرۋدى كوزدەيدى.
جوبا ەكولوگيالىق تۇراقتىلىق قاعيداتتارىن ەسكەرە وتىرىپ جۇزەگە اسىرىلادى. جەر بەدەرىنە اسەردى بارىنشا ازايتۋ، ەكولوگيالىق دالىزدەر مەن سۋ رەسۋرسىن ساقتاۋ، تۇراقتى ەكولوگيالىق مونيتورينگ جۇرگىزۋ جانە ەكولوگيالىق راسىمدەردى ساقتاۋ قاراستىرىلعان.
كەلۋشىلەردىڭ قاۋىپسىزدىگىن قار كوشكىنىنەن قورعاۋدىڭ كەشەندى جۇيەسى، قۇتقارۋ بەكەتتەرى مەن مەديسينالىق پۋنكتتەر قامتاماسىز ەتەدى. كولىك قولجەتىمدىلىگىن ارتتىرۋ ماقساتىندا كولىك قالدىرۋعا ارنالعان تۇراقتار، قوعامدىق كولىك، تەگىن ەلەكتر شاتتلدارى جانە تاۋ اۋماقتارى اراسىندا قاتىنايتىن، ونىڭ ىشىندە اسپالى جولداردى قامتيتىن ءبىرىڭعاي قوزعالىس جۇيەسى جوسپارلانعان.
جوبا جىل بويى سپورتپەن شۇعىلدانۋعا جانە بەلسەندى دەمالىسقا، شاڭعى مەكتەپتەرىن دامىتۋعا، بۇقارالىق ءىس-شارالار وتكىزۋگە جانە نۇسقاۋشىلار دايارلاۋعا جاعداي جاسايدى. سونداي-اق قولجەتىمدى ينفراقۇرىلىم، وتباسىلىق جانە بەيىمدەلگەن سپورت ارقىلى الەۋمەتتىك جانە ينكليۋزيۆتى باعىت ساقتالادى.
جوبانى جۇزەگە اسىرۋ بيزنەس، تۋريزم، كولىك جانە قۇرىلىس سالالارىنىڭ دامۋىنا سەرپىن بەرىپ، 10 مىڭنان استام جۇمىس ورنىن اشۋعا مۇمكىندىك بەرەدى. ەسەپ بويىنشا، جوبانىڭ ەكونوميكالىق تيىمدىلىگى جىلىنا 500 ملرد تەڭگەدەن اسادى.
