الماتىدا قالا اكىمىنىڭ ورىنباسارى ابزال نۇكەنوۆ «تالداۋ مەكتەبى. الماتى» ءبىلىم بەرۋ جوباسىنىڭ قاتىسۋشىلارىمەن كەزدەستى. كەزدەسۋ Narxoz Business School الاڭىندا ءوتىپ، قازىرگى قوعامدىق قۇندىلىقتار، شەشىم قابىلداۋداعى تالداۋدىڭ ءرولى جانە جاستاردىڭ قالانى دامىتۋعا قوساتىن ۇلەسى تاقىرىپتارىنا ارنالدى. بۇل تۋرالى قالالىق جاستار ساياساتى باسقارماسىنىڭ وكىلدەرى حابارلادى.
ءىس-شاراعا تالداۋ مەكتەبىنىڭ تۇلەكتەرى، عىلىمي قاۋىمداستىق وكىلدەرى، جوعارى وقۋ ورىندارىنىڭ وقىتۋشىلارى، بيزنەس جانە قوعامدىق ۇيىمداردىڭ مۇشەلەرى قاتىستى. قاتىسۋشىلار جاڭا بۋىن كوشباسشىسى قانداي بولۋى كەرەكتىگىن، رەسۋرسقا جاۋاپكەرشىلىكپەن قاراۋ مادەنيەتىن قالىپتاستىرۋ جولدارىن جانە مەملەكەتتىك باسقارۋدا تالداۋدىڭ ماڭىزىن تالقىلادى.
كەزدەسۋدى اشقان الماتى قالاسى اكىمىنىڭ ورىنباسارى ابزال نۇكەنوۆ بۇگىندە مەملەكەتتىڭ تابىسى تەك ەكونوميكالىق كورسەتكىشتەرمەن ەمەس، ادامي كاپيتالدىڭ ساپاسىمەن، ءبىلىم دەڭگەيىمەن جانە ازاماتتاردىڭ جاۋاپكەرشىلىگىمەن ولشەنەتىنىن ايتتى.
«تالداۋ مەكتەبى. الماتى» – جاي عانا ءبىلىم بەرۋ باعدارلاماسى ەمەس. بۇل دەرەكتەرگە سۇيەنە وتىرىپ شەشىم قابىلداۋ مادەنيەتىن قالىپتاستىراتىن، كاسىبي ساراپشىلار قاۋىمداستىعىن دامىتاتىن جانە الماتىنىڭ وزەكتى ماسەلەلەرىنە قاتىستى ناقتى ۇسىنىستار ازىرلەيتىن بىرەگەي الاڭ»، – دەدى ابزال نۇكەنوۆ.
ونىڭ ايتۋىنشا، مەملەكەت باسشىسى ايقىنداعان قۇندىلىقتار بۇگىندە قالانىڭ جاستار ساياساتىنىڭ نەگىزگى باعىتىنا اينالعان. «ادال ازامات»، «تازا قازاقستان»، «زاڭ جانە ءتارتىپ» قاعيداتتارى «جاسىل ەل»، «ەكو-رەيندجەرلەر»، «Azamat»، «ناركوSTOP» جوبالارىندا، وڭىرلىك عىلىمي گرانتتاردا جانە «جاستار قاتىساتىن بيۋدجەت» باستاماسىندا كورىنىس تاپقان. بۇل جوبالار جاستارعا قوعامدىق ماڭىزى بار ماسەلەلەردى شەشۋگە اتسالىسىپ، يدەياسىن جۇزەگە اسىرۋعا مۇمكىندىك بەرەدى.
كەزدەسۋ بارىسىندا جاۋاپكەرشىلىك، ادىلدىك جانە رەسۋرستاردى ۇقىپتى پايدالانۋ مادەنيەتىن قالىپتاستىرۋ جايىنا دا ەرەكشە نازار اۋدارىلدى.
Science Hub ءبىلىم بەرۋ پلاتفورماسىنىڭ ەديۋكەيتورى گۇلدانا مامبەتوۆا «ادال ازامات» تۇجىرىمداماسى جاستاردىڭ كۇندەلىكتى ءومىرىنىڭ اجىراماس بولىگىنە ەرىكتىلىك قىزمەت، ءبىلىم بەرۋ، عىلىمي-زەرتتەۋ جۇمىستارى جانە جەكە جاۋاپكەرشىلىك ارقىلى اينالا الاتىنىن ايتتى.
«ادىلەتتى قازاقستان ەڭ الدىمەن مادەنيەتتى، ءبىلىمدى، جاۋاپتى ءارى ادال ازاماتتاردان باستالادى»، – دەدى ول.
ءال-فارابي اتىنداعى قازۇۋ جانىنداعى قۇقىق ۇستەمدىگى جانە جاساندى ينتەللەكت ورتالىعىنىڭ ديرەكتورى دانا بايتۇقايەۆا «زاڭ جانە ءتارتىپ» قاعيداتى شەشىمدەردى ناقتى دەرەكتەرگە سۇيەنە وتىرىپ قابىلداۋدى تالاپ ەتەتىنىن ايتتى. سونداي-اق، قازىرگى تەحنولوگيا تەك تۋىنداعان ماسەلەلەردى شەشۋگە ەمەس، ولاردىڭ الدىن الۋعا دا قىزمەت ەتۋى قاجەت ەكەنىن جەتكىزدى.
قازىرگى جاستاردىڭ قۇندىلىقتارى تۋرالى IT-كاسىپكەر ايبولات قۇلاتاي دا پىكىر ءبىلدىردى. ونىڭ ايتۋىنشا، سيفرلىق داۋىردە جوعارى وقۋ ورىندارى بىلىكتى مامان عانا ەمەس، قوعام الدىنداعى جاۋاپكەرشىلىگى جوعارى ازامات تاربيەلەۋگە دە باسىمدىق بەرۋگە ءتيىس.
كەزدەسۋ سوڭىندا قاتىسۋشىلار «تالداۋ مەكتەبى. الماتى» جوباسى كاسىبي ءبىلىمىن قالانىڭ وزەكتى تۇيتكىلدەرىن شەشۋگە جانە قوعامدىق ماڭىزى بار باستامالاردى ازىرلەۋگە باعىتتاي الاتىن جاس ساراپشىلار قاۋىمداستىعىن قالىپتاستىرۋعا ىقپال ەتەتىنىنە توقتالدى.
