الماتى قالاسىندا ستۋدەنتتىك جاتاقحانالار قۇرىلىسى بويىنشا جوبالىق كەڭسە ينۆەستورلاردى جاڭا قۇرىلىس جانە قولدانىستاعى عيماراتتاردى قايتا جاڭعىرتۋ جوبالارىنا قاتىسۋعا شاقىرادى، - دەپ حابارلايدى alnews.
اتالعان باستاما مەملەكەتتىك سۋبسيديالاۋ باعدارلاماسى اياسىندا جۇزەگە اسىرىلىپ، ستۋدەنتتەرگە ارنالعان زاماناۋي ءارى قولجەتىمدى جاتاقحانالار قورىن ۇلعايتۋعا باعىتتالعان.
مەملەكەتتىك سۋبسيديالاۋ - ستراتەگيالىق ماڭىزى بار سالالاردى دامىتۋعا باعىتتالعان قارجىلىق قولداۋ تەتىگى. الماتىدا ستۋدەنتتەردى ساپالى ءارى قولجەتىمدى جاتاقحانامەن قامتاماسىز ەتۋ وسى باعدارلامانىڭ نەگىزگى باسىمدىقتارىنىڭ ءبىرى بولىپ تابىلادى.
باعدارلاما اياسىندا ينۆەستورلار جاڭا جاتاقحانا قۇرىلىسىن ءوز قاراجاتى ەسەبىنەن جۇزەگە اسىرا الادى نەمەسە قولدانىستاعى عيماراتتاردى قايتا بەيىمدەپ، ستۋدەنتتىك جاتاقحانا رەتىندە ىسكە قوسا الادى. بۇل رەتتە ينۆەستورلار ءۇشىن تۇراقتى تابىس كوزى رەتىندە ستۋدەنتتەردىڭ تۇرۋ اقىسى قاراستىرىلعان، سونداي-اق جاتاقحانا بازاسىندا كوممەرسيالىق كەڭىستىكتەردى ءتيىمدى پايدالانۋ مۇمكىندىگى بار. بۇدان بولەك، بانكتىك نەسيەلەر بويىنشا سۋبسيديا الۋ، جەر تەلىمدەرىن راسىمدەۋ، سونداي-اق قۇجاتتاردى دايىنداۋ بارىسىندا تەگىن زاڭگەرلىك كەڭەس پەن تولىق سۇيەمەلدەۋ كورسەتىلەدى.
الماتى قالاسىندا ستۋدەنتتىك جاتاقحانالار قۇرىلىسىنا قولداۋ كورسەتۋ ماقساتىندا قۇرىلعان جوبالىق كەڭسە مەملەكەتتىك باعدارلامانىڭ ءتيىمدى ىسكە اسىرىلۋىن ۇيلەستىرەدى جانە ينۆەستورلارعا بارلىق كەزەڭدە قولداۋ كورسەتەدى. بۇگىنگى تاڭدا 120-دان استام ينۆەستوردىڭ جوباعا قىزىعۋشىلىق تانىتۋى ستۋدەنتتىك ينفراقۇرىلىمدى دامىتۋعا بيزنەستىڭ جوعارى سۇرانىسىن كورسەتەدى.
مەكەنجاي: الماتى قالاسى، بايتۋرسىن ۇلى كوشەسى، 22ك1، 4-قابات
بايلانىس نومەرى: +7 701 528 28 37 دامير كۋتۋموۆ، جوبالىق كەڭسە جەتەكشىسى
الماتى قالاسىنىڭ ستۋدەنتتىك ينفراقۇرىلىمىن دامىتۋعا ءوز ۇلەسىڭىزدى قوسىڭىز.
