الماتى قالاسىنىڭ سپورت باسقارماسى سپورتتىق رەزەرۆ سپورتشىلارىن فۋنكسيونالدىق دياگنوستيكادان وتكىزۋ جانە عىلىمي-مەديسينالىق قولداۋ جۇيەسىن ەنگىزۋ بويىنشا پيلوتتىق جوبانى جۇزەگە اسىرۋدى باستادى، - دەپ حابارلايدى alnews.
بۇگىندە سپورتشىنى دايارلاۋ تەك جاتتىعۋ مەن جارىسقا قاتىسۋمەن شەكتەلمەيدى. سپورتشى اعزاسىنىڭ جۇكتەمەنى قالاي قابىلدايتىنىن، قالپىنا كەلۋ دەڭگەيىن جانە شامادان تىس شارشاۋ مەن جاراقات الۋ ءقاۋپىنىڭ بار-جوعىن انىقتاۋ دا اسا ماڭىزدى. سوندىقتان سپورت عىلىمىنىڭ زاماناۋي جەتىستىكتەرى الەمدىك تاجىريبەدە سپورتشىلاردى دايارلاۋدىڭ اجىراماس بولىگىنە اينالىپ وتىر.
باعدارلاما اياسىندا سپورتشىلار سپورتتىق مەديسينا مەن فۋنكسيونالدىق دياگنوستيكانىڭ وزىق ادىستەرىن پايدالانا وتىرىپ، كەشەندى تەكسەرۋدەن وتەدى. زەرتتەۋ بارىسىندا ماماندار جۇرەك-قانتامىر جۇيەسىنىڭ قىزمەتىن، تىنىس الۋ جۇيەسىنىڭ جاي-كۇيىن، توزىمدىلىك دەڭگەيىن جانە اعزانىڭ فيزيكالىق جۇكتەمەدەن كەيىنگى قالپىنا كەلۋ قابىلەتىن باعالايدى. ول ءۇشىن InBody اپپاراتى ارقىلى دەنە قۇرامىن تالداۋ، ەلەكتروەنسەفالوگرافيا (ەەگ)، سونداي-اق ناقتى ۋاقىت رەجيمىندە سىمسىز ەلەكتروكارديوگرافيالىق باقىلاۋمەن جۇرگىزىلەتىن ەرگوسپيرومەتريالىق تەستىلەۋ سياقتى زاماناۋي دياگنوستيكالىق تەحنولوگيالار قولدانىلادى.
جوبا Trinity Corp سپورتتىق مەديسينا جانە دياگنوستيكا ورتالىعىنىڭ بازاسىندا جۇزەگە اسىرىلۋدا. قول جەتكىزىلگەن كەلىسىمدەردىڭ ناتيجەسىندە الماتىلىق سپورتشىلار كەشەندى مەديسينالىق تەكسەرۋدەن ارنايى شارتتار نەگىزىندە ءوتۋ مۇمكىندىگىنە يە بولدى. دياگنوستيكا سپورتشىلاردىڭ فۋنكسيونالدىق مۇمكىندىكتەرىن وبەكتيۆتى باعالاۋعا ارنالعان ارنايى جابدىقتاردىڭ كومەگىمەن جۇرگىزىلەدى.
باعدارلامانىڭ العاشقى قاتىسۋشىلارى سپورتقا دارىندى بالالارعا ارنالعان مامانداندىرىلعان مەكتەپ-ينتەرناتتىڭ تاربيەلەنۋشىلەرى بولدى. قازىرگى ۋاقىتتا 133 جاس سپورتشى تەرەڭدەتىلگەن دياگنوستيكالىق تەكسەرۋدەن وتۋدە. جىل سوڭىنا دەيىن جوبا اياسىندا رەسپۋبليكالىق جانە حالىقارالىق جارىستارعا قاتىساتىن الماتىنىڭ سپورتتىق رەزەرۆىندەگى 200-دەن استام سپورتشى تەكسەرۋدەن وتەدى.
سپورتتىق مەديسينا دارىگەرىنىڭ ايتۋىنشا، مۇنداي دياگنوستيكانىڭ باستى ارتىقشىلىعى سپورتشىنىڭ قازىرگى فيزيكالىق دايىندىعىن باعالاۋمەن عانا شەكتەلمەيدى.
«زاماناۋي سپورتتىق دياگنوستيكا اعزانىڭ شامادان تىس شارشاۋدىڭ، قالپىنا كەلۋدىڭ جەتكىلىكسىزدىگىن جانە سپورتتىق ناتيجەلەردىڭ تومەندەۋىنە نە جاراقاتقا اكەلۋى مۇمكىن قاۋىپ-قاتەرلەردى ەرتە كەزەڭدە انىقتاۋعا مۇمكىندىك بەرەدى. الىنعان مالىمەتتەر جاتتىقتىرۋشىلار مەن ماماندارعا جاتتىعۋ ۇدەرىسىن نەعۇرلىم ءتيىمدى جوسپارلاپ، جۇكتەمەنى ءار سپورتشىنىڭ ەرەكشەلىگىنە ساي رەتتەۋگە جانە ونىڭ جاعدايىن دايارلىقتىڭ بارلىق كەزەڭىندە باقىلاۋدا ۇستاۋعا كومەكتەسەدى»، – دەيدى مامان.
جوبا اياقتالعاننان كەيىن ونىڭ ناتيجەلەرىنە جان-جاقتى تالداۋ جۇرگىزىلىپ، الماتى قالاسىنىڭ سپورتتىق رەزەرۆ سپورتشىلارىن عىلىمي قولداۋ جۇيەسىن ودان ءارى جەتىلدىرۋ باعىتتارى قاراستىرىلادى.
