14 قازاندا الماتى گالەرەياسىندا شىڭعىس ايتماتوۆتىڭ شىعارماشىلىق مۇراسى مەن الداعى 100 جىلدىق مەرەيتويىنا ارنالعان «ارقاۋ» («سۆيازۋيۋششايا نيت») حالىقارالىق كورمەسى اشىلدى، - دەپ حابارلايدى alnews.
ەكسپوزيسياعا قىرعىزستاندىق سۋرەتشىلەردىڭ 65 تۋىندىسى قويىلدى. بۇل تۋرالى الماتى قالاسى مادەنيەت باسقارماسىنىڭ وكىلدەرى ايتتى.
كورمەدە قىرعىز رەسپۋبليكاسى سۋرەتشىلەر وداعىنىڭ مۇشەلەرى كۋبانىچبەك يبراگيموۆ، باحرامجون تەميروۆ، سادىك مۋرزاكانوۆ جانە ازيزبەك سۋلايمانوۆ تۋىندىلارىن ۇسىندى.
سۋرەتشىلەر كارتيناسىندا ايتماتوۆ شىعارمالارىنىڭ سيۋجەتىن، كەيىپكەرلەرى مەن وبرازدارىن بەينەلەپ، كورەرمەندەرگە تانىس ادەبي تۋىندىلارعا جاڭاشا كوزقاراسپەن قاراۋعا مۇمكىندىك بەرەدى.
كورمەنىڭ اشىلۋ سالتاناتىنا تۇركسوي حالىقارالىق تۇركى مادەنيەتى ۇيىمىنىڭ باس حاتشىسى، قىرعىزستاننىڭ حالىق جازۋشىسى سۇلتان رايەۆ قاتىستى. ول مۇنداي كورمەلەر كورەرمەندەردى ءارتۇرلى ەل سۋرەتشىلەرىنىڭ شىعارماشىلىعىمەن تانىستىرىپ، قازاقستان مەن قىرعىزستان اراسىندا جاڭا بىرلەسكەن جوبالاردى جۇزەگە اسىرۋعا مۇمكىندىك بەرەتىنىن اتاپ ءوتتى.
قوناقتار اراسىندا قىرعىز رەسپۋبليكاسىنىڭ الماتىداعى كونسۋلى، تۇركسوي باس حاتشىسى، بەلگىلى جانە جاس سۋرەتشىلەر، مادەنيەت قايراتكەرلەرى مەن شىعارماشىلىق زيالى قاۋىم وكىلدەرى دە بولدى.
كورمە الماتى قالاسىنىڭ مادەنيەت باسقارماسى مەن تۇركسوي ۇيىمىنىڭ قولداۋىمەن، سونداي-اق قازاقستان مەن قىرعىزستان سۋرەتشىلەر وداعىنىڭ اتسالىسۋىمەن ۇيىمداستىرىلدى.
ەكسپوزيسيا 2026 جىلى 7 قاراشاعا دەيىن اشىق بولادى. كورمەنى سەيسەنبىدەن جەكسەنبىگە دەيىن ساعات 10:00-دەن 19:00-گە دەيىن دوستىق داڭعىلى، 44 مەكەنجايىندا تەگىن تاماشالاۋعا بولادى. دۇيسەنبى – سانيتارلىق كۇن.
