الماتىدا №15 ساناتوريالىق ۇلگىدەگى مەكتەپ-ينتەرناتتىڭ جاڭا عيماراتى پايدالانۋعا بەرىلدى، - دەپ حابارلايدى alnews.
شۇعىلا شاعىناۋدانىندا ورنالاسقان ءبىلىم بەرۋ مەكەمەسى 340 بالاعا ارنالعان. جاڭا عيمارات وقۋشىلاردىڭ ساپالى ءبىلىم الۋىنا عانا ەمەس، دەنساۋلىعىن نىعايتىپ، سپورتپەن شۇعىلدانىپ، شىعارماشىلىق قابىلەتىن دامىتۋىنا قولايلى جاعداي جاساۋعا مۇمكىندىك بەرەدى.
مەكتەپتىڭ اشىلۋ راسىمىنە الماتى قالاسى ءبىلىم باسقارماسى باسشىسىنىڭ ورىنباسارى ايدىن سايلاۋباي مەن ناۋرىزباي اۋدانى اكىمىنىڭ ورىنباسارى اينۇر بەكجانوۆا قاتىستى. قوناقتار ءبىلىم وشاعىنىڭ تاريحىمەن، وقۋ-تاربيە جۇمىسىمەن، ماتەريالدىق-تەحنيكالىق بازاسىمەن جانە جاڭا عيماراتتىڭ مۇمكىندىكتەرىمەن تانىستى.
كەشەننىڭ جالپى اۋماعى 17 543 شارشى مەتر. مۇندا زاماناۋي قۇرال-جابدىقتارمەن جانە ينتەراكتيۆتى پانەلدەرمەن جابدىقتالعان 28 وقۋ كابينەتى بار. سونىمەن قاتار ينفورماتيكا، سيفرلىق ساۋاتتىلىق، روبوتوتەحنيكا، حيميا، فيزيكا جانە بيولوگيا پاندەرىنە ارنالعان ارنايى كابينەتتەر قاراستىرىلعان.
وقۋشىلاردىڭ دەنە شىنىقتىرۋىنا دا ەرەكشە كوڭىل بولىنگەن. مەكتەپتە سپورت زالى، باسسەين جانە ستاديون بار. ەكسكۋرسيا بارىسىندا وقۋشىلار قوناقتارعا سپورتتىق شەبەرلىگىن كورسەتتى.
ءىس-شارانىڭ ارنايى قوناعى سيدنەي وليمپياداسىنىڭ چەمپيونى بەكزات ساتتارحانوۆتىڭ اناسى سىرلىكۇل شويبەكوۆا بولدى. ول جاس سپورتشىلاردى قۇتتىقتاپ، بيىك بەلەستى باعىندىرىپ، جاڭا جەڭىسكە ۇمتىلۋعا شاقىردى.
مەكتەپتەگى ءىس-شارا شىعارماشىلىق ونەرپازداردىڭ قويىلىمدارىمەن دە جالعاستى. اكت زالىندا وقۋشىلار «ىبىراي جاققان ءبىلىم شىراعى» اتتى ساحنالىق قويىلىم ۇسىندى. ال مۋزىكا جانە بي ۇيىرمەلەرىنىڭ مۇشەلەرى شاعىن كونسەرتتىك باعدارلاما ازىرلەدى.
جاڭا كەشەندە شىعارماشىلىق شەبەرحانالار، 220 ورىندىق اكت زالى جانە امفيتەاتر دا بار. بالالاردىڭ قاۋىپسىزدىگىن قامتاماسىز ەتۋ ءۇشىن بەينەباقىلاۋ جانە Face ID جۇيەلەرى ورناتىلعان. سونداي-اق زاماناۋي اسحانا جۇمىس ىستەيدى.
عيمارات مۇمكىندىگى شەكتەۋلى ادامدار ءۇشىن دە تولىقتاي بەيىمدەلگەن.
جاڭا عيماراتتىڭ اشىلۋىمەن مەكتەپ ۇجىمى مەن وقۋشىلاردى قۇتتىقتاعان ناۋرىزباي اۋدانى اكىمىنىڭ ورىنباسارى اينۇر بەكجانوۆا مەملەكەت تاراپىنان وسكەلەڭ ۇرپاقتىڭ جان-جاقتى دامۋىنا قاجەتتى جاعداي جاساۋعا ەرەكشە كوڭىل بولىنەتىنىن اتاپ ءوتتى.
«بۇگىن بارشامىز ءۇشىن ەرەكشە ءارى قۋانىشتى كۇن. №15 ساناتوريالىق ۇلگىدەگى مەكتەپ-ينتەرناتتىڭ جاڭا عيماراتى بالالارعا ەسىگىن ايقارا اشىپ، ساپالى ءبىلىم الىپ، جان-جاقتى دامۋىنا مۇمكىندىك بەرىپ وتىر. بۇل وقۋشىلار ءبىلىم الىپ قانا قويماي، دەنساۋلىعىن نىعايتىپ، شىعارماشىلىق جانە سپورتتىق قابىلەتىن شىڭداي الاتىن زاماناۋي ءبىلىم بەرۋ ورتاسى»، – دەدى ول.
ونىڭ ايتۋىنشا، مەكتەپ جاڭا وقۋ جىلىن زاماناۋي ينفراقۇرىلىممەن جانە وقۋشىلاردىڭ جايلى ءبىلىم الۋىنا قاجەتتى بارلىق جاعدايمەن باستاپ وتىر. ەندىگى مىندەت – وسى مۇمكىندىكتى ءتيىمدى پايدالانىپ، ءار بالانىڭ قابىلەتىن اشۋعا جاعداي جاساۋ.
«ۇستازدار قاۋىمىنا ەڭبەگىنە جەمىس، ال وقۋشىلارىمىزعا ساپالى ءبىلىم، زور دەنساۋلىق جانە بيىك جەتىستىكتەر تىلەيمىن»، – دەدى ناۋرىزباي اۋدانى اكىمىنىڭ ورىنباسارى.
