رەسپۋبليكا كۇنى قارساڭىندا الماتىداعى قازاقستان-بريتان تەحنيكالىق ۋنيۆەرسيتەتىنىڭ الدىنداعى الاڭدا «مەنىڭ ەلىم – مەنىڭ بولاشاعىم» اتتى پاتريوتتىق فلەشموب ءوتتى، - دەپ حابارلايدى alnews.
ءىس-شاراعا مىڭ جاس قاتىسىپ، ەل بولاشاعىنا ۇلەس قوسۋعا دايىن ەكەنىن ءبىلدىردى. بۇل تۋرالى قالالىق جاستار ساياساتى باسقارماسىنىڭ وكىلدەرى حابارلادى.
فلەشموب فورتەپيانو مەن ءانسامبلدىڭ سۇيەمەلدەۋىمەن ءوتتى. قاتىسۋشىلار كولەمى 14×7 مەتر بولاتىن قازاقستاننىڭ مەملەكەتتىك تۋىن جايىپ، ەلىمىزدىڭ ءانۇرانىن بىرگە شىرقادى.
باعدارلامانىڭ نەگىزگى بولىمدەرىنىڭ ءبىرى جاستاردىڭ قازاقستانعا ارناعان ۇندەۋى بولدى. قاتىسۋشىلارعا «قازاقستان، بولاشاقتا ساعان نە قالدىرامىز؟» دەگەن سۇراق قويىلدى.
جاستار ءبىلىمدى ۇرپاق تاربيەلەۋ، ءقاۋىپسىز قوعام قالىپتاستىرۋ، قورشاعان ورتانى قورعاۋ، ادىلدىكتى ساقتاۋ جانە ەل تاۋەلسىزدىگىن نىعايتۋعا ۇلەس قوسۋعا ۋادە بەردى.
«مەن ءبىلىمدى قازاقستاندى قالىپتاستىرامىن!»، «مەن ءقاۋىپسىز قازاقستان قۇرامىن!»، «مەن جاسىل قازاقستاندى ساقتايمىن!»، «ادىلەتتى قازاقستان ءۇشىن ەڭبەك ەتەمىن!»، «قازاقستاننىڭ تاۋەلسىزدىگىن نىعايتامىن!» دەگەن ۋادەلەر ايتىلدى.
«قازاقستان پرەزيدەنتى قاسىم-جومارت توقايەۆ جاۋاپتى، ءبىلىمدى ءارى وتانشىل ازاماتتاردى تاربيەلەۋدىڭ ماڭىزىن بىرنەشە رەت اتاپ وتكەن بولاتىن. ءىس-شارادا ايتىلعان ويلار «ادال ازامات» تۇجىرىمداماسىنىڭ نەگىزگى قاعيداتتارىمەن دە ۇندەسەدى. بۇل تۇجىرىمدامادا وتانعا دەگەن سۇيىسپەنشىلىك ەڭ الدىمەن ناقتى ىسپەن، ادال ەڭبەكپەن جانە قوعامعا پايدا كەلتىرۋگە دايىن بولۋمەن ولشەنەدى»، – دەدى اكسيانى ۇيىمداستىرۋشىلار.
ولاردىڭ ايتۋىنشا، ءىس-شارا جاستاردىڭ ەل بولاشاعى ءۇشىن جەكە جاۋاپكەرشىلىگىن ارتتىرۋعا جانە قوعامدىق ومىرگە بەلسەندى ارالاسۋدىڭ ماڭىزىن كورسەتۋگە باعىتتالعان.
فلەشموب سوڭىندا قاتىسۋشىلار مەملەكەتتىك ءانۇراندى بىرگە ورىندادى.
