الماتى اكىمى دارحان ساتىبالدى رەسپۋبليكا الاڭىندا اياقتالعان كورىكتەندىرۋ جۇمىستارىنىڭ ناتيجەسىمەن تانىستى، - دەپ حابارلايدى alnews.
جۇمىس ساپارى بارىسىندا وعان قالانىڭ باستى قوعامدىق كەڭىستىكتەرىنىڭ ءبىرى – رەسپۋبليكا الاڭىن قايتا جاڭعىرتۋ قورىتىندىسى تانىستىرىلىپ، سونداي-اق ساتبايەۆ كوشەسىنىڭ بايزاقوۆ كوشەسىنەن لۋگانسكيي كوشەسىنە دەيىنگى ارالىعىن كەشەندى كوركەيتۋ جوباسىنىڭ جۇزەگە اسىرىلۋ بارىسى باياندالدى.
جوبانىڭ تۇجىرىمداماسىن ۇلىبريتانيانىڭ لوندون قالاسىنداعى LDA Design كومپانياسى ازىرلەگەن. بۇل جۇمىستى الماتى قالاسىنىڭ قوعامدىق كەڭىستىكتەردى دامىتۋ باسقارماسى «قاسبەتتەن قاسبەتكە دەيىن» قاعيداتى نەگىزىندە جۇرگىزدى.
جوبانىڭ باستى ماقساتى – جۇرگىنشىلەرگە باسىمدىق بەرىلەتىن، زاماناۋي، ءقاۋىپسىز ءارى جايلى ورتا قالىپتاستىرۋ. رەسپۋبليكا الاڭىندا كورىكتەندىرىلگەن اۋماقتىڭ جالپى كولەمى 4،5 گەكتار.
الاڭدا قوعامدىق كەڭىستىكتىڭ جابىندارى تولىق جاڭارتىلىپ، ينجەنەرلىك جەلىلەر، سىرتقى جارىقتاندىرۋ جانە اۆتوماتتاندىرىلعان سۋارۋ جۇيەسى زامان تالابىنا ساي جاڭعىرتىلدى. قۇرىلىس بارىسىندا پايدالانۋ مەرزىمى 10 جىلدان زاماناۋي، ءتوزىمدى ماتەريالدار قولدانىلدى. بۇل الداعى ۋاقىتتا اۋماقتى كۇتىپ-ۇستاۋ شىعىنىن ايتارلىقتاي ازايتۋعا مۇمكىندىك بەرەدى.
كوگالداندىرۋ جۇمىستارى اۋقىمدى كولەمدە جۇرگىزىلدى. الاڭعا 233 ءىرى اعاش، 63 مىڭنان استام بۇتا جانە 17،7 مىڭ كوپجىلدىق وسىمدىك ەگىلىپ، كوگالدار مەن بەدە جامىلعىسى توسەلدى. كەشكى ۋاقىتتا جاسىل جەلەك ساۋلەتتىك-كوركەم جارىقپەن ارلەنىپ، قوعامدىق كەڭىستىكتىڭ اجارىن اشا تۇسەدى. سونىمەن بىرگە، اۋماققا 129 زاماناۋي جارىق شامى ورناتىلىپ، الاڭ تولىق جارىقتاندىرىلدى.
تۇرعىنداردىڭ جايلى دەمالىسى ءۇشىن زاماناۋي بالالار ويىن الاڭدارى، سەرۋەندەۋ جولدارى، دەمالىس ايماقتارى جانە ەكى امفيتەاتر سالىندى. سونداي-اق، الاڭدا ۆەلوسيپەد جولاقتارى جاسالىپ، ولار بولاشاقتا ساتبايەۆ كوشەسى بويىمەن وتەتىن ءبىرىڭعاي ۆەلوجول جەلىسىنىڭ قۇرامىنا ەنەدى. بۇدان بولەك، ورىندىقتار، قوقىس جاشىكتەرى، ۆەلوسيپەد تۇراقتارى، ۇستەلدەر، كرەسلولار، لاندشافتىق جيھازدار، اركالار جانە باسقا دا شاعىن ساۋلەت نىساندارىن قامتيتىن 500-دەن استام كورىكتەندىرۋ ەلەمەنتى ورناتىلدى.
جاڭارتىلعان الاڭنىڭ باستى ەرەكشەلىكتەرىنىڭ ءبىرى – قوعامدىق كەڭىستىكتىڭ جاڭا لاندشافتىق كەلبەتىن ايشىقتايتىن سەگىز ساندىك سۋ ايدىنى. بۇعان قوسا، بۇرىننان بار سۋبۇرقاقتار تولىق جوندەۋدەن وتكىزىلىپ، زاماناۋي جاڭا سۋبۇرقاق كەشەندەرى سالىندى. ولار قالا تۇرعىندارى مەن قوناقتارىنىڭ سۇيىكتى دەمالىس ورىندارىنىڭ بىرىنە اينالماق.
جوبا اياسىندا كولىك جانە جاياۋ جۇرگىنشى ينفراقۇرىلىمىن جەتىلدىرۋگە دە ەرەكشە كوڭىل ءبولىندى. ساتبايەۆ كوشەسىندە جاڭا قوعامدىق كولىك ايالداماسى پايدالانۋعا بەرىلىپ، قالانىڭ اكىمشىلىك ءارى ىسكەرلىك ورتالىعىنا قاتىناۋ مۇمكىندىگى جاقساردى. سونىمەن قاتار قوسىمشا باعدارشامدار ورناتىلىپ، رەتتەلەتىن جۇرگىنشىلەر وتكەلدەرى جاسالدى جانە حالىقتىڭ بارلىق ساناتىنا قولايلى كەدەرگىسىز ورتا قالىپتاستىرىلدى.
جوبانى ىسكە اسىرۋ بارىسىندا ەسكى جابىندار الىنىپ، جاڭا ينجەنەرلىك كوممۋنيكاسيالار تارتىلدى، اۆتوماتتى سۋارۋ جۇيەسى، پاۆيلوندارعا ارنالعان نەگىزدەر جانە باسقا دا قاجەتتى قۇرىلىس جۇمىستارى ورىندالدى.
جوبا تولىق اياقتالعان سوڭ ساتبايەۆ كوشەسى بويىندا ءبىرتۇتاس زاماناۋي قوعامدىق كەڭىستىك قالىپتاسادى. ال جاڭارعان رەسپۋبليكا الاڭى الماتىنىڭ ەڭ كورىكتى ءارى تارتىمدى قوعامدىق ورىندارىنىڭ ءبىرى رەتىندە تۇرعىندار مەن قالا قوناقتارىنا سەرۋەندەۋگە، تىنىعۋعا، سپورتپەن اينالىسۋعا، مادەني ءىس-شارالار مەن مەرەكەلىك باسقوسۋلار وتكىزۋگە قولايلى مەكەن بولماق.
