الماتىدا 26 شىلدە كۇنى وتكەن قالالىق Recycle بىرگە ەكولوگيالىق اكسياسى بارىسىندا قۇرامىندا سىنابى بار 430 شام جينالدى. ءقاۋىپتى تۇرمىستىق قالدىقتار كەيىننەن كادەگە جاراتۋ ءۇشىن «Eco Almaty» جشس-نە تاپسىرىلدى، - دەپ حابارلايدى alnews.
قۇرامىندا سىناپ بولعاندىقتان مۇنداي شامداردى كادىمگى قوقىس جاشىكتەرىنە تاستاۋعا بولمايدى. سەبەبى شىنىسى سىنعان جاعدايدا ۋلى زات اۋاعا، توپىراققا جانە سۋعا تارالۋى مۇمكىن.
«بىزگە تاپسىرىلعان شامدار قاۋىپسىزدىك تالاپتارىنا ساي ساقتالىپ، كەيىن ارنايى مامانداندىرىلعان ۇيىمعا جىبەرىلەدى. مۇنداي قالدىقتاردى سىناپتىڭ قورشاعان ورتاعا تارالۋىنا جول بەرمەۋ ءۇشىن مىندەتتى تۇردە بولەك جيناۋ قاجەت»، – دەدى Eco Almaty وكىلدەرى.
اكسياعا قاتىسۋشىلار پلاستيك، ماكۋلاتۋرا، شىنى، مەتالل قاپتامالار، پايدالانىلعان باتارەيالار، ەسكى ەلەكترونيكا، كابەلدەر جانە باسقا دا قالدىق تۇرلەرىن اكەلدى. سۇرىپتالعاننان كەيىن قايتا وڭدەۋگە جارامدى ماتەريالدار ءتيىستى ۇيىمدارعا جىبەرىلەدى.
اكسيا تۇرعىنداردى، ەرىكتىلەردى، ەكولوگيالىق بەلسەندىلەردى، بيزنەس وكىلدەرىن جانە قوعامدىق ۇيىمداردى بىرىكتىردى. ءىس-شارا الاڭىندا زاتتاردى قايتا پايدالانۋ جانە ايىرباستاۋ ايماقتارى دا جۇمىس ىستەدى. تۇرعىندار كيىم-كەشەك، اياق كيىم، ويىنشىقتار، كىتاپتار، ىدىس-اياق جانە باسقا دا جارامدى زاتتاردى جاڭا يەلەرىنە تاپسىردى.
قاتىسۋشىلار كىتاپتارمەن، بولمە وسىمدىكتەرىمەن، قالەمشەلەرمەن جانە تۇقىمدارمەن الماسىپ، قالدىقتاردى بولەك جيناۋ مەن جاۋاپتى تۇتىنۋ تاقىرىبىنداعى شەبەردىڭ ساباقتارى مەن دارىستەرگە قاتىستى.
Recycle بىرگە جوباسى Greenup.kz قوعامدىق قورى تاراپىنان 2019 جىلدان بەرى جۇزەگە اسىرىلىپ كەلەدى. جوبا الماتىدا قالدىقتاردى سۇرىپتاۋ، قايتا وڭدەۋ جانە زاتتاردى قايتا پايدالانۋ مادەنيەتىن دامىتۋعا ىقپال ەتەدى.
