الماتىنىڭ مەدەۋ اۋدانىندا مەملەكەت جانە قوعام قايراتكەرى، ۇلى وتان سوعىسىنىڭ ارداگەرى قازتاي نۇرمانبەت ۇلى ۇلتاراقوۆتىڭ قۇرمەتىنە مەموريالدىق تاقتانىڭ اشىلۋ ءراسىمى ءوتتى، - دەپ حابارلايدى alnews.
ەستەلىك تاقتا قازتاي ۇلتاراقوۆ تۇرعان تولەبايەۆ كوشەسى، 142ء-ۇيدىڭ قاسبەتىنە ورناتىلدى.
قازتاي ۇلتاراقوۆ 1942 جىلى ءوز ەركىمەن مايدانعا اتتانعان. كالينين مايدانىندا اسكەري قىزمەت اتقارىپ، الدىمەن بولىمشە، كەيىن ۆزۆود جانە جەكە شاڭعىشىلار باتالونىنىڭ كومانديرى بولدى. 1943 جىلى اۋىر جارالانىپ، اسكەري ەرلىگى ءۇشىن وتان سوعىسى جانە قىزىل جۇلدىز وردەندەرىمەن ماراپاتتالدى.
بەيبىت جىلدارى قازتاي ۇلتاراقوۆ باسشىلىق قىزمەتتەر اتقارىپ، ەكونوميكا عىلىمدارىنىڭ كانديداتى اتاندى. ول كوپتەگەن عىلىمي ەڭبەك پەن كىتاپتىڭ اۆتورى بولدى. ەلگە سىڭىرگەن ەڭبەگى مەن مەملەكەتكە ادال قىزمەتى ءۇشىن لەنين وردەنىمەن، ەكى ەڭبەك قىزىل تۋ وردەنىمەن، «قۇرمەت بەلگىسى» وردەنىمەن جانە ءبىرقاتار مەدالمەن ماراپاتتالعان.
سالتاناتتى ءراسىم بارىسىندا قاتىسۋشىلار قازتاي ۇلتاراقوۆتىڭ رۋحىنا تاعزىم ەتىپ، ونىڭ ەلدىڭ دامۋىنا قوسقان ۇلەسىن ەسكە الدى.
مەموريالدىق تاقتانىڭ ورناتىلۋى – كورنەكتى تۇلعانىڭ ەسىمىن ۇلىقتاپ، ونىڭ ونەگەلى ءومىر جولى مەن قالا تاريحىنداعى ورنىن كەيىنگى ۇرپاق جادىندا ساقتاۋعا باعىتتالعان.
