بۇگىن الماتىدا دەنساۋلىق ساقتاۋ جۇيەسىندەگى قازاقستاننىڭ العاشقى سيفرلىق شەشىمدەر قۇزىرەتتىلىگى ورتالىعى اشىلدى، - دەپ حابارلايدى alnews.
ورتالىق قالالىق كلينيكالىق اۋرۋحانانىڭ تەلەمەديسينا ورتالىعى بازاسىندا قۇرىلىپ، قالاداعى مەديسينالىق ۇيىمداردى سيفرلاندىرۋ جۇمىسىن ۇيلەستىرەدى. بۇل تۋرالى الماتى قالاسى قوعامدىق دەنساۋلىق ساقتاۋ باسقارماسىنىڭ وكىلدەرى ايتتى.
ورتالىقتى قۇرۋ قاجەتتىلىگى مەديسينالىق ۇيىمداردىڭ ءوزارا ۇيلەسىمدى جۇمىس ىستەي بەرمەيتىن ءارتۇرلى سيفرلىق پلاتفورمالاردى پايدالانۋىنا بايلانىستى تۋىندادى. سونىمەن قاتار كەيبىر ۇيىمدار بىردەي قىزمەت اتقاراتىن جۇيەلەردى بولەك ساتىپ الۋى مۇمكىن. بۇل شىعىنداردىڭ قايتالانۋىنا اكەلەدى.
جاڭا ورتالىق سيفرلىق شەشىمدەردىڭ ءبىرىڭعاي ءتىزىمىن جۇرگىزىپ، ساتىپ الۋ راسىمدەرى باستالعانعا دەيىن ۇسىنىمدار بەرىپ، ادىستەمەلىك قولداۋ كورسەتەدى. بۇل قاراجاتتى ۇتىمدى جۇمساۋعا، جيناقتالعان تاجىريبەنى ەسكەرۋگە جانە ءوزارا ۇيلەسىمدى تەحنولوگيانى ەنگىزۋگە مۇمكىندىك بەرەدى.
جوسپارلانعان سيفرلىق شەشىمدى تىركەۋگە ءبىر جۇمىس كۇنى، ال ونى قاراۋعا بەس جۇمىس كۇنىنە دەيىن ۋاقىت بەرىلەدى. ورتالىق جاڭا زاڭدى تۇلعا قۇرماي جانە قوسىمشا قارجى بولمەي، جۇمىس ىستەپ تۇرعان تەلەمەديسينا ورتالىعىنىڭ بازاسىندا اشىلدى.
ەسكە سالايىق، تەلەمەديسينا ورتالىعى COVID-19 پاندەمياسى كەزىندە جۇمىسىن باستاپ، سودان بەرى الماتى تۇرعىندارى مەن مەديسينالىق ۇيىمدار اراسىنداعى ماڭىزدى بايلانىس بۋىنىنا اينالدى.
قالا تۇرعىندارى تاۋلىك بويى جۇمىس ىستەيتىن 1312 نومىرىنە حابارلاسىپ، انىقتامالىق اقپارات الا الادى، مەديسينالىق كومەككە قاتىستى ماسەلەلەر بويىنشا ءوتىنىش ءبىلدىرىپ، شاعىم نەمەسە العىس قالدىرا الادى.
التى جىل ىشىندە ورتالىق 3،8 ميلليونعا جۋىق قوڭىراۋدى قابىلداپ، 348 مىڭ ءوتىنىشتى تىركەدى. COVID-19 جۇقتىرعان 175 مىڭ ناۋقاس پەن 37 مىڭ جۇكتى ايەل مەديسينالىق باقىلاۋدا بولدى.
ءقازىر ورتالىق ماماندارى جۇكتى ايەلدەردىڭ، سونداي-اق ستاسيوناردان شىعارىلعان نارەستەلەر مەن بالالاردىڭ مەديسينالىق باقىلاۋعا الىنۋىن قاداعالايدى.
ورتالىق جۇمىسى ءقازىردىڭ وزىندە ناتيجە بەرىپ وتىر: مەملەكەتتىك ەمحانالارعا قاتىستى شاعىمدار سانى 76%-عا ازايدى. سونىمەن قاتار ستاسيوناردان شىعارىلعان بالالاردى ۋاقىتىلى تەكسەرۋ جانە جاڭا تۋعان نارەستەلەردى پاتروناجدىق باقىلاۋ كورسەتكىشتەرى جاقساردى.
قالا تۇرعىندارى ءۇشىن بۇل مەديسينالىق ۇيىمدار اراسىنداعى ءوزارا ءىس-قيمىلدىڭ ۇيلەسىمدى بولۋىن، اقپاراتتىڭ جەدەل الماسۋىن، سونداي-اق زاماناۋي سيفرلىق تەحنولوگيانىڭ ارقاسىندا مەديسينالىق كومەكتىڭ قولجەتىمدىلىگى مەن ساپاسىنىڭ ارتۋىن بىلدىرەدى.
