الماتىدا قالاداعى بارلىق جوعارى وقۋ ورنىنىڭ ستۋدەنتتەرىنە ارنالعان داعدارىس ورتالىعى اشىلدى، - دەپ حابارلايدى alnews.
جاڭا ورتالىق مۇحامەدجان تىنىشپايەۆ اتىنداعى ALT Universityء-دىڭ جاڭارتىلعان №1 ستۋدەنتتەر ءۇيىنىڭ بازاسىندا ءبىر اي بويى جۇمىس ىستەيدى. مۇندا ومىرلىك قيىن جاعدايعا تاپ بولعان جاستار ۋاقىتشا تۇرىپ، كەشەندى قولداۋ الا الادى.
ورتالىقتىڭ باستى ەرەكشەلىگى – كومەك تەك ALT University ستۋدەنتتەرىنە عانا كورسەتىلمەيدى. ومىرىندەگى ءتۇرلى قيىندىققا بايلانىستى ۋاقىتشا باسپاناسىز قالعان نەمەسە الەۋمەتتىك، پسيحولوگيالىق نە كونسۋلتاسيالىق قولداۋدى قاجەت ەتەتىن الماتىداعى كەز كەلگەن جوعارى وقۋ ورنىنىڭ ستۋدەنتى ورتالىققا جۇگىنە الادى. وسى ماقساتتا ستۋدەنتتەر ۇيىنەن 50 ورىن ءبولىندى.
الماتى قالاسى جاستار ساياساتى باسقارماسى باسشىسىنىڭ ورىنباسارى ميراس نىسانالييەۆتىڭ ايتۋىنشا، داعدارىس ورتالىعىنىڭ اشىلۋى ستۋدەنت جاستاردى قولداۋدىڭ قولدانىستاعى جۇيەسىن كەڭەيتىپ، جاستاردىڭ تۇرمىستىق ماسەلەسىمەن قاتار الەۋمەتتىك قيىندىقتارىنا دا جەدەل دەن قويۋعا مۇمكىندىك بەرەدى.
«الماتى – ەلىمىزدەگى ەڭ ءىرى ستۋدەنتتىك ورتالىق. سوندىقتان ءبىلىم الۋ ءۇشىن قالاعا كەلگەن ءاربىر جاستىڭ قيىن جاعدايدا جالعىز قالمايتىنىن سەزىنۋى ءبىز ءۇشىن اسا ماڭىزدى. ستۋدەنتتەر ۋاقىتشا باسپاناسىز قالۋدان باستاپ، پسيحولوگيالىق نەمەسە الەۋمەتتىك كومەك قاجەت بولاتىن ءتۇرلى جاعدايعا تاپ بولۋى مۇمكىن. داعدارىس ورتالىعى قاي جوعارى وقۋ ورنىندا ءبىلىم الاتىنىنا قاراماستان، ءار ستۋدەنت قولداۋ سۇراپ جۇگىنە الاتىن ورىن بولۋى ءتيىس. ءبىزدىڭ مىندەتىمىز – ۋاقىتشا باسپانا بەرۋمەن عانا شەكتەلمەي، جاستىڭ قيىن كەزەڭنەن ءوتىپ، تولىققاندى وقۋىنا جانە قالىپتى ومىرىنە ورالۋىنا كومەكتەسۋ»، — دەدى الماتى قالاسى جاستار ساياساتى باسقارماسى باسشىسىنىڭ ورىنباسارى ميراس نىسانالييەۆ.
ورتالىق ماۋلەنوۆ كوشەسى، 108ا مەكەنجايىندا ورنالاسقان. عيمارات كۇردەلى جوندەۋدەن وتكەن. جاتاقحانا جالپى 487 ورىنعا ەسەپتەلگەن، عيماراتتىڭ اۋماعى 7 مىڭ شارشى مەتردەن اسادى.
قايتا جاڭعىرتۋدان كەيىن مۇندا زاماناۋي ستۋدەنتتىك ورتا قالىپتاستىرىلدى: تۇرعىن بولمەلەر، اس ۇيلەر مەن تۇرمىستىق ءۇي-جايلار، ءوز بەتىنشە دايىندالۋعا ارنالعان كەڭىستىكتەر، دەمالىس بولمەلەرى، كىر جۋاتىن ورىن، سپورت ايماعى جانە جاتتىعۋ زالى جابدىقتالدى.
داعدارىس ورتالىعىنىڭ ستۋدەنتتەرى ءۇشىن وقۋ جانە تۇرمىستىق ايماقتارى بار جەكە تۇرعىن بولمەلەر، ءاسۇي مودۋلدەرى مەن سانيتارلىق-گيگيەنالىق ءۇي-جايلار قاراستىرىلعان. سونداي-اق ولار سپورت زالى مەن مەديسينالىق پۋنكتتى پايدالانا الادى. قاجەت بولعان جاعدايدا مەديسينالىق پۋنكتتە العاشقى كومەك كورسەتىلەدى. ورتالىقتا تۇرعان كەزەڭدە جاستار پسيحولوگيالىق، الەۋمەتتىك جانە كونسۋلتاسيالىق قولداۋ الا الادى. ءاربىر ءوتىنىشتىڭ قۇپيالىلىعىن ساقتاۋ جانە ستۋدەنتتىڭ جاعدايىنا جەكە قاراۋ ورتالىق جۇمىسىنىڭ ماڭىزدى قاعيداتى بولماق.
ق ر عىلىم جانە جوعارى ءبىلىم مينيسترلىگى جوعارى جانە جوعارى وقۋ ورنىنان كەيىنگى ءبىلىم كوميتەتى ءتوراعاسىنىڭ ورىنباسارى اقەركە ابىلايحاننىڭ ايتۋىنشا، مۇنداي جوبالار ستۋدەنتتىك ينفراقۇرىلىمدى دامىتۋ تۇرعىسىنان عانا ەمەس، ءبىلىم الۋشىلاردى جان-جاقتى قولداۋ جۇيەسىن قالىپتاستىرۋ ءۇشىن دە ماڭىزدى.
«زاماناۋي ءبىلىم بەرۋ ورتاسى – تەك اۋديتوريالار، باعدارلامالار مەن وقىتۋ ساپاسى عانا ەمەس. ستۋدەنتتىڭ قانداي جاعدايدا تۇراتىنى جانە قيىن ومىرلىك جاعدايعا تاپ بولعاندا قايدا جۇگىنە الاتىنىن ءبىلۋى دە اسا ماڭىزدى. ءتۇرلى جوعارى وقۋ ورنىنىڭ ستۋدەنتتەرىنە قولجەتىمدى داعدارىس ورتالىعىنىڭ اشىلۋى – وسىنداي قولداۋ جۇيەسىن دامىتۋداعى ماڭىزدى قادام. مۇندا جاستار ۋاقىتشا باسپانا، كونسۋلتاسيالىق، الەۋمەتتىك جانە پسيحولوگيالىق كومەك الىپ، ەڭ باستىسى، وقۋىن الاڭسىز جالعاستىرۋعا مۇمكىندىك الادى»، — دەدى اقەركە ابىلايحان.
قالالىق داعدارىس ورتالىعىن قۇرۋ ومىرلىك قيىن جاعدايعا تاپ بولعان الماتى ستۋدەنتتەرىنە جەدەل كومەك كورسەتۋدىڭ قوسىمشا تەتىگىن قالىپتاستىرۋعا باعىتتالعان. جوبا بىرنەشە باعىتتى – ۋاقىتشا باسپانا، الەۋمەتتىك بەيىمدەۋ، پسيحولوگيالىق قولداۋ جانە ءقاۋىپسىز ءارى جايلى جاعدايدا وقۋىن جالعاستىرۋ مۇمكىندىگىن بىرىكتىرەدى. داعدارىس ورتالىعىنىڭ بايلانىس نومىرلەرى: +7 700 255 14 43، +7 700 950 95 28، +7 727 237 01 70.
