20 قىركۇيەكتە، قالا كۇنى، وسپانوۆ كوشەسىندەگى تەررەنكۋردا قازاقستاندىق جانە شەتەلدىك گراففيتي سۋرەتشىلەرى قاتىساتىن ارت-فەستيۆال وتەدى، - سووبششاەت alnews.
ءىس-شارا الماتىداعى زاماناۋي كوشە ونەرىنىڭ اشىق گالەرەياسى — Street Art Avenue جوباسىن دامىتۋدىڭ جاڭا كەزەڭىنە جول اشادى.
قالادا عيماراتتاردىڭ قاسبەتىن جاڭارتۋ باعدارلاماسى جالعاسىپ جاتىر. جوباعا ەنگەن كەيبىر عيماراتتاردىڭ قابىرعاسىندا تانىمال مۋرالدار بار. الماتىدا قالىپتاسقان مادەني كەڭىستىكپەن ساباقتاستىقتى ساقتاۋ ماقساتىندا وسى تۋىندىلاردىڭ اۆتورلارىنا جاڭا جۇمىستار جاساۋ ۇسىنىلدى.
قازىرگى مۋرالدار سيفرلىق فورماتتا ساقتالادى. ولاردىڭ ورنالاسقان جەرلەرىنە QR-كود قويىلىپ، سول ارقىلى ءتۇپنۇسقا جۇمىستاردى كورۋگە، ولاردىڭ تاريحى مەن اۆتورلارى تۋرالى بىلۋگە بولادى. ال سۋرەتشىلەردىڭ جاڭا جۇمىستارى Street Art Avenue كەڭىستىگىندە ۇسىنىلادى.
ءىس-شاراعا گيپەررەاليستىك Balloon Graff تۋىندىسىنىڭ اۆتورى، بريتانيالىق سۋرەتشى Fanakapan، ماسكەۋدەن 310 / 310 Squad توبىنىڭ وكىلدەرى، بەلارۋس سۋرەتشىسى Kontra / TAKTAK، سونداي-اق قازاقستاندىق گراففيتي سۋرەتشىلەرى قاتىسادى.
فەستيۆالدىڭ باستى تۋىندىسى الماتىنىڭ سيمۆولدارىنىڭ ءبىرى قار بارىسىنا ارنالعان ورتاق كومپوزيسيا بولماق. ءار سۋرەتشى قار بارىسىنىڭ بەينەسىن وزىنشە كورسەتىپ، ءتۇرلى ستيل مەن تەحنيكانى ءبىر تۋىندىدا توعىستىرادى.
كۇنى بويى قالا تۇرعىندارى مەن قوناقتارى مۋرالداردىڭ قالاي جاسالىپ جاتقانىن تاماشالاپ، ولاردىڭ اۆتورلارىمەن تانىسا الادى.
