قالا كۇنى قارساڭىندا الماتىنىڭ اۋەزوۆ اۋدانىندا جاستارعا ارنالعان جاڭا كوميۋنيتي ورتالىق اشىلدى، - دەپ حابارلايدى alnews.
اۋماعى 400 شارشى مەتر بولاتىن كەڭىستىكتە شىعارماشىلىقپەن اينالىسۋعا، زاماناۋي تەحنولوگيانى مەڭگەرۋگە جانە جاڭا داعدىلاردى دامىتۋعا جاعداي جاسالعان. ورتالىقتاعى بارلىق قىزمەت جاستار ءۇشىن تەگىن. جاڭا ورتالىقتا دىبىس جازۋ ستۋدياسى، بي زالى، روبوتوتەحنيكا جانە 3D-مودەلدەۋ ايماعى، سيفرلىق كونتەنت ازىرلەۋگە ارنالعان كەڭىستىك، سونداي-اق ءبىلىم بەرۋ جانە كەڭەس بەرۋ الاڭدارى قاراستىرىلعان. بۇل تۋرالى الماتى قالاسى جاستار ساياساتى باسقارماسىنىڭ وكىلدەرى حابارلادى.
ورتالىقتىڭ مۇمكىندىكتەرىمەن الماتى قالاسى اكىمىنىڭ ورىنباسارى ابزال نۇكەنوۆ تانىستى. جاڭا نىساننىڭ ىسكە قوسىلۋى قالا اكىمى دارحان ساتىبالدىنىڭ قولداۋىمەن جۇزەگە اسىرىلىپ جاتقان جاستار ورتالىقتارى جەلىسىن كەڭەيتۋ جۇمىستارىنىڭ ءبىر بولىگى بولدى. قازىرگى ۋاقىتتا الماتىنىڭ بارلىق اۋدانىندا وسىنداي 12 الاڭ جۇمىس ىستەيدى.
«جاستار ورتالىعى تەك ءىس-شارا وتكىزەتىن ورىن ەمەس، جاستاردىڭ ءبىلىم الىپ، دامىپ، يدەياسىن جۇزەگە اسىرا الاتىن كەڭىستىك بولۋى ماڭىزدى»، – دەدى ابزال نۇكەنوۆ.
ورتالىقتاعى جاڭا جوبالاردىڭ ءبىرى «AI كرەاتور» كۋرسى. باعدارلاما اياسىندا جاستار كونتەنت وندىرىسىندە جاساندى ينتەللەكت قۇرالدارىن پايدالانۋدى مەڭگەرەدى. قاتىسۋشىلار يدەيا مەن سەناريي ازىرلەۋدەن باستاپ، ۆيزۋال، دىبىس جانە مونتاج جاساۋعا دەيىنگى نەگىزگى كەزەڭدەردى ۇيرەنەدى. كۋرستىڭ العاشقى لەگىنە 20-عا جۋىق ادام جازىلعان.
سونىمەن قاتار دىبىس جازۋ ستۋدياسىندا اندەر مەن پودكاستتار جازۋعا، بي زالىندا ءتۇرلى ۆوركشوپتار ۇيىمداستىرۋعا مۇمكىندىك بار. ارنايى كونتەنت ايماعى فوتو جانە بەينە تۇسىرۋگە ارنالعان. ال روبوتوتەحنيكا جانە 3D-مودەلدەۋ كەڭىستىگىندە ورتالىقتىڭ اشىلۋىنا وراي الماتىنىڭ باستى نىشاندارىنىڭ ءبىرى الما بەينەلەنگەن «تىلەك اعاشى» ازىرلەندى.
ورتالىقتىڭ اشىلۋىمەن قاتار «ALMATY 24 sagat» بەينەبايقاۋى باستالدى. بايقاۋ شارتى بويىنشا قاتىسۋشىلار 24 ساعات ىشىندە الماتى، اۋدانى، سۇيىكتى ورىندارى نەمەسە قالا تۇرعىندارى تۋرالى قىسقا بەينەروليك ءتۇسىرۋى كەرەك.
«ءبىز ءۇشىن ءاربىر جاستىڭ باعىتىن تابۋىنا – جاڭا داعدى مەڭگەرۋىنە، تەحنولوگيادا نەمەسە شىعارماشىلىقتا ءوزىن سىناپ كورۋىنە، نە بولماسا ءوز جوباسىن ىسكە قوسۋىنا مۇمكىندىك بولۋى ماڭىزدى»، – دەدى الماتى قالاسى جاستار ساياساتى باسقارماسىنىڭ باسشىسى ازيز كاجدەنبەك.
جىل باسىنان بەرى الماتىداعى كوميۋنيتي ورتالىقتارىنىڭ قىزمەتىن 10،6 مىڭنان استام جاس پايدالانعان. ولار جۇمىسقا ورنالاسۋ جانە كاسىبي باعدار بويىنشا كومەك الىپ، پسيحولوگيالىق جانە قۇقىقتىق كەڭەستەرگە جۇگىنگەن. بۇدان بولەك، «زاڭ جانە ءتارتىپ» باعىتى بويىنشا 18 مىڭنان استام ادامدى قامتىعان 190-عا جۋىق ءىس-شارا ۇيىمداستىرىلدى. ال «تازا قازاقستان» باستاماسى اياسىندا وتكەن 80-نەن استام ەكولوگيالىق اكسياعا 10 مىڭنان استام جاس الماتىلىق قاتىستى.
