الماتىدا قالا كۇنىنە وراي 250 ورىندىق №17 مەكتەپ-ينتەرنات عيماراتىن سەيسميكالىق كۇشەيتۋ جانە كۇردەلى جوندەۋ جۇمىستارى اياقتالدى، - دەپ حابارلايدى alnews.
عيمارات 1963 جىلى سالىنعان. مۇندا سوڭعى رەت كۇردەلى جوندەۋ 2000 جىلدارى جۇرگىزىلگەن. بۇگىندە نىسان تولىقتاي جاڭارتىلدى.
جوبا اياسىندا وقۋ جانە جاتىن كورپۋستارىنىڭ كوتەرگىش قۇرىلىمدارى كۇشەيتىلىپ، شاتىرى، قاسبەتى مەن ىشكى بولمەلەرى جوندەلدى. ينجەنەرلىك جەلىلەر تولىعىمەن جاڭارتىلىپ، ورتكە قارسى قورعانىس، بەينەباقىلاۋ، كىرۋدى باقىلاۋ جانە بايلانىس جۇيەلەرى جاڭعىرتىلدى.
وقۋشىلار ءۇشىن وقۋ كابينەتتەرى، ينفورماتيكا كابينەتى، اقپاراتتىق-كىتاپحانا ورتالىعى، مەديسينالىق بلوك، سپورت زالى جانە 100 ورىندىق اسحانا قاراستىرىلعان.
مەكتەپ اۋماعى دا ايتارلىقتاي وزگەردى. 1،35 گەكتار اۋماقتا باسكەتبول جانە ۆولەيبول الاڭدارى، ءارتۇرلى جاستاعى بالالارعا ارنالعان ويىن الاڭدارى، مەكتەپتەگى ءىس-شارالار وتكىزۋگە ارنالعان الاڭ، دەمالىس ايماقتارى مەن جۇرگىنشىلەر جولدارى جابدىقتالدى. اۋماق كوركەيتىلىپ، كوگالداندىرىلدى، سىرتقى جارىقتاندىرۋ جۇيەسى ورناتىلدى.
سونداي-اق عيماراتتا ەرەكشە قاجەتتىلىگى بار بالالار ءۇشىن كەدەرگىسىز ورتا قالىپتاستىرىلدى.
جاڭعىرتۋدان كەيىن 60 جىلدان استام تاريحى بار مەكتەپ جۇمىسىن ءقاۋىپسىز ءارى جايلى جاعدايدا جالعاستىرادى.
№17 مەكتەپ-ينتەرناتتى جاڭارتۋ — الماتىنىڭ ءبىلىم بەرۋ ينفراقۇرىلىمىن دامىتۋ باعىتىنداعى جۇمىستاردىڭ ءبىر بولىگى. بيىل قالادا 31 ءبىلىم بەرۋ نىسانىندا جۇمىستار قولعا الىنعان. ونىڭ ىشىندە جاڭا مەكتەپتەر مەن قوسىمشا عيماراتتار سالۋ، سونداي-اق قولدانىستاعى عيماراتتاردى جاڭعىرتۋ جانە سەيسميكالىق كۇشەيتۋ جۇمىستارى بار.
