الماتىدا قالا اكىمىنىڭ ءبىرىنشى ورىنباسارى الماسحان سماتلايەۆتىڭ توراعالىعىمەن كوپپاتەرلى تۇرعىن ءۇي قورىن باسقارۋ جانە تۇرعىن ۇيلەردى الداعى جىلىتۋ ماۋسىمىنا دايىنداۋ ماسەلەسىنە ارنالعان كەڭەيتىلگەن جۇمىس كەڭەسى ءوتتى، - دەپ حابارلايدى alnews.
جيىنعا جاۋاپتى باسقارمالار، اۋدان اكىمدىكتەرى، توتەنشە جاعدايلار دەپارتامەنتى، پيك جانە ميب قاۋىمداستىقتارىنىڭ وكىلدەرى، سونداي-اق كوپپاتەرلى تۇرعىن ۇيلەردى باسقارۋ ورگاندارىنىڭ ءتوراعالارى قاتىستى.
كەڭەستە تۇرعىن ءۇي قورىن قىس ماۋسىمىنا دايىنداۋ، پيك پەن ميب جۇمىسىنىڭ تيىمدىلىگىن ارتتىرۋ، ءورت قاۋىپسىزدىگىن قامتاماسىز ەتۋ، ورتاق مۇلىكتى كۇتىپ-ۇستاۋ جانە باسقارۋ ورگاندارىنىڭ مەملەكەتتىك ورگاندارمەن ءوزارا ءىس-قيمىلى ماسەلەلەرى قارالدى.
كەڭەستى اشقان الماسحان سماتلايەۆ كوپپاتەرلى تۇرعىن ۇيلەردى ساپالى كۇتىپ-ۇستاۋ قالا قىزمەتىنىڭ باستى مىندەتتەرىنىڭ ءبىرى بولىپ قالا بەرەتىنىن ايتتى.
«كوپپاتەرلى تۇرعىن ءۇي قورىنىڭ جاي-كۇيى – ءبىزدىڭ جۇمىسىمىزدىڭ تيىمدىلىگىنىڭ كورسەتكىشى. نەگىزگى مىندەتتەر – تۇرعىنداردىڭ قاۋىپسىزدىگىن قامتاماسىز ەتۋ، ۇيلەردى ءتيىستى دەڭگەيدە كۇتىپ-ۇستاۋ جانە زاڭ بۇزۋشىلىقتاردىڭ الدىن الۋ»، – دەدى الماسحان سماتلايەۆ.
الماتى قالاسىنىڭ كوممۋنالدىق ينفراقۇرىلىم جانە تۇرعىن ءۇي ينسپەكسياسى باسقارماسىنىڭ باسشىسى شارحان تۇرسىنبايەۆ تۇرعىن ءۇي قورىنىڭ قازىرگى جاعدايى تۋرالى بايانداما جاسادى.
«تۇرعىنداردىڭ كوپپاتەرلى ۇيلەردى باسقارۋ مەن كۇتىپ-ۇستاۋ ساپاسىنا قوياتىن تالاپتارى جىل سايىن ارتىپ كەلەدى. سوندىقتان باسقارۋ ورگاندارى اشىق ءارى جاريا جۇمىس ىستەۋى، قاجەتتى جوندەۋ جۇمىستارىن ۋاقىتىلى جۇرگىزۋى جانە تۇرعىن ءۇي يەلەرىنە قارجىنىڭ قالاي جۇمسالعانى جونىندە تۇراقتى تۇردە ەسەپ بەرىپ وتىرۋعا ءتيىس»، – دەدى شارحان تۇرسىنبايەۆ.
كەڭەس قورىتىندىسى بويىنشا الماسحان سماتلايەۆ كوپپاتەرلى تۇرعىن ۇيلەردى جىلىتۋ ماۋسىمىنا ساپالى دايىنداۋدى، ورتاق مۇلىكتى تەكسەرۋدى جانە ءبىرىنشى كەزەكتە اتقارىلاتىن جوندەۋ جۇمىستارىن ايقىنداۋدى تاپسىردى. سونداي-اق، ءتيىستى باسقارمالارعا توتەنشە جاعدايلار دەپارتامەنتىمەن بىرلەسىپ ءورت قاۋىپسىزدىگى تالاپتارىنىڭ ساقتالۋىنا باقىلاۋدى كۇشەيتۋ، تۇرعىن ۇيلەردىڭ جەرتولەلەرىندە ورنالاسقان كوممەرسيالىق نىسانداردى تەكسەرۋ جانە انىقتالعان زاڭ بۇزۋشىلىقتاردى جويۋ بويىنشا شارالار قابىلداۋ جۇكتەلدى. بۇعان قوسا، پوليسيا دەپارتامەنتىمەن بىرلەسىپ كوپپاتەرلى تۇرعىن ۇيلەردە زاڭناما تالاپتارىنىڭ ساقتالۋىن قامتاماسىز ەتۋگە باعىتتالعان پروفيلاكتيكالىق جۇمىستار كۇشەيتىلەدى.
