الماتىدا ستراتەگيالىق ەكولوگيالىق باعالاۋ اياسىندا قالانىڭ باس جوسپارىنا ەنگىزىلەتىن تۇزەتۋلەر بويىنشا قوعامدىق تىڭداۋلار ءوتىپ جاتىر، - دەپ حابارلايدى alnews.
باسقوسۋدىڭ نەگىزگى تاقىرىبى – قالانى ەكولوگيالىق تۇرعىدان ورنىقتى دامىتۋعا باعىتتالعان دامۋ سەنارييى.
تىڭداۋ بارىسىندا الماتى قالاسى ەنەرگەتيكا جانە سۋمەن جابدىقتاۋ باسقارماسىنىڭ باسشىسى نۇرباقىت سەرىكباي ەنەرگەتيكالىق جانە كوممۋنالدىق ينفراقۇرىلىمدى دامىتۋدىڭ نەگىزگى باعىتتارىن تانىستىردى. ونىڭ ايتۋىنشا، نەگىزگى مىندەتتەردىڭ قاتارىندا سالانى سيفرلاندىرۋ، سۋ رەسۋرستارىن ۇتىمدى پايدالانۋ، ەلەكتر كولىگىنە ارنالعان ينفراقۇرىلىمدى دامىتۋ جانە قالانىڭ ورنىقتى دامۋىنا ىقپال ەتەتىن جوبالاردى جۇزەگە اسىرۋ بار.
تالقىلاۋ بارىسىندا تۇرعىندار حالىق سانىنىڭ ارتۋى مەن تۇرعىن ءۇي قۇرىلىسىنىڭ قارقىندى جۇرۋىنە بايلانىستى الماتىنى اۋىز سۋمەن قامتاماسىز ەتۋ ماسەلەسىنە ەرەكشە نازار اۋداردى.
قويىلعان سۇراقتارعا جاۋاپ بەرگەن نۇرباقىت سەرىكباي سۋمەن جابدىقتاۋ جۇيەسىن دامىتۋ جۇمىستارى 2040 جىلعا دەيىنگى ۇزاق مەرزىمدى جوسپار اياسىندا جۇرگىزىلىپ جاتقانىن ايتتى.
«بۇگىندە سۋمەن جابدىقتاۋ ماسەلەسى ەڭ الدىمەن ناۋرىزباي اۋدانىندا جانە بوستاندىق اۋدانىنىڭ كەي بولىگىندە وزەكتى بولىپ تۇر. سۋ تاپشىلىعىنىڭ الدىن الۋ ءۇشىن جاڭا سۋ الۋ نىساندارىن، سۇزگى ستانسيالارىن سالۋ، قولدانىستاعى سۋ كوزدەرىنىڭ قۋاتىن كەڭەيتۋ جانە ينجەنەرلىك جەلىلەردى جاڭعىرتۋ بويىنشا ءبىرقاتار جوبا جۇزەگە اسىرىلىپ جاتىر»، – دەدى باسقارما باسشىسى.
