الماتىدا قازاقستان مەن ورتالىق ازيا ەلدەرىنىڭ جاس كوشباسشىلارىن بىرىكتىرگەن Almaty Youth Forum 2026 حالىقارالىق جاستار فورۋمى ءوتىپ جاتىر، - دەپ حابارلايدى alnews.
فورۋمنىڭ نەگىزگى تاقىرىپتارى – جاساندى ينتەللەكت، كليماتتىق تەحنولوگيا، سيفرلىق قاۋىپسىزدىك، ەرىكتىلىك جانە الەۋمەتتىك يننوۆاسيا.
فورۋمدى الماتى اكىمدىگى، قازاقستانداعى بۇۇ بالالار قورى (يۋنيسەف) جانە الماتىنىڭ ەرىكتىلەر فرونت كەڭسەسى تۇراقتى دامۋ جولىنداعى حالىقارالىق ەرىكتىلەر جىلى اياسىندا ۇيىمداستىردى.
«بۇگىندە جاستاردىڭ يدەياسىن ناقتى جوبالارعا اينالدىرىپ، باستامالارىنا مەملەكەت، حالىقارالىق ۇيىمدار مەن بيزنەس تاراپىنان قولداۋ كورسەتىلەتىن ورتا قالىپتاستىرۋ اسا ماڭىزدى. Almaty Youth Forum قازاقستان مەن ورتالىق ازيا جاستارىن تۇراقتى دامۋ مەن ەرىكتىلىكتىڭ ورتاق قۇندىلىقتارى توڭىرەگىنە بىرىكتىرەتىن وسىنداي الاڭعا اينالدى»، – دەدى الماتى قالاسى جاستار ساياساتى باسقارماسىنىڭ باسشىسى ازيز كاجدەنبەك.
ەكى كۇنگە جوسپارلانعان فورۋم باعدارلاماسىنا پانەلدىك پىكىرتالاستار، پراكتيكالىق ۆوركشوپتار جانە جاساندى ينتەللەكت، قارجىلىق ساۋاتتىلىق، تۇراقتى دامۋ مەن ينۆەستيسيا سالاسىنداعى ساراپشىلاردىڭ باياندامالارى ەنگىزىلگەن.
فورۋمنىڭ ماڭىزدى وقيعالارىنىڭ ءبىرى ءال-فارابي اتىنداعى قازاق ۇلتتىق ۋنيۆەرسيتەتىنىڭ بازاسىندا UNICEF Zhastary Hub ورتالىعىنىڭ قۇرىلاتىنى تۋرالى جاريالانۋى بولدى. يۋنيسەف پەن ۋنيۆەرسيتەت اراسىندا ىنتىماقتاستىق تۋرالى مەموراندۋمعا قول قويىلدى. جاڭا حاب ەرىكتىلىك پەن جاستار باستامالارىن دامىتۋعا ارنالعان الاڭعا اينالادى.
فورۋم اياسىندا جاستار جوبالارىنىڭ كورمەسى دە ۇيىمداستىرىلدى. قازاقستان مەن قىرعىزستاننان كەلىپ تۇسكەن 211 ءوتىنىمنىڭ ىشىنەن 29 جوبا فينالعا ءوتتى. ولاردىڭ قاتارىندا جاساندى ينتەللەكت پەن سپۋتنيكتىك دەرەكتەردى پايدالانا وتىرىپ، مۇزدىق كولدەردىڭ جارىلۋ ءقاۋپىن ەرتە ەسكەرتۋگە ارنالعان GLOFcast جۇيەسى، ونەركاسىپتىك كاسىپورىندارداعى قاۋىپسىزدىكتى ارتتىرۋعا باعىتتالعان Samruq.AI جوباسى جانە اۆتوكولىكتەردەن شىعاتىن زياندى شىعارىندىلاردى ازايتۋعا ارنالعان EcoTube جوباسى بار.
11 تامىزدا فورۋم Almaty Museum of Arts سەرىكتەستىگىمەن جالعاسادى. قاتىسۋشىلاردى شىعارماشىلىق سەسسيالار، پىكىرتالاستار جانە جاستار جوبالارى بايقاۋىنىڭ فينالى كۇتەدى. فينالدا ون كوماندا جوبالارىن ساراپشىلار القاسىنا تانىستىرادى. ۇزدىك جوبالارعا باستامالارىن ءارى قاراي دامىتۋ ءۇشىن مەنتورلىق قولداۋ كورسەتىلەدى.
