الماتىداعى پەريناتولوگيا جانە بالالار كارديوحيرۋرگياسى ورتالىعىنىڭ اۋماعىندا «نارەستەلەر اللەياسى» اشىلدى، - دەپ حابارلايدى alnews.
يگى باستاما اياسىندا وسى ورتالىقتا دۇنيەگە كەلگەن بالالاردىڭ وتباسىلارى 80 ءتۇپ الما اعاشىن ەكتى. بۇل تۋرالى قالانىڭ قوعامدىق دەنساۋلىق ساقتاۋ باسقارماسىنىڭ وكىلدەرى ايتتى.
اكسياعا بالالارىمەن بىرگە اتا-انالار، اتا-اجەلەر قاتىستى. ءىس-شارا بارىسىندا الماتى قالاسى قوعامدىق دەنساۋلىق ساقتاۋ باسقارماسىنىڭ باسشىسى مارات پاشيموۆ قاتىسۋشىلاردى اللەيانىڭ اشىلۋىمەن قۇتتىقتادى.
«بۇل اللەيا – ءومىردىڭ، وتباسىلىق باقىت پەن ءۇمىتتىڭ سيمۆولى. ءار اعاش ءسابيدىڭ ومىرگە كەلۋىمەن ساباقتاسىپ، ءار وتباسىنىڭ تاريحىنداعى ەرەكشە ءساتتى بەينەلەيدى. الما اعاشتارى تامىرىن تەرەڭگە جايىپ، جايقالىپ ءوسسىن. ولارمەن بىرگە بالالارىمىز دا ءوسىپ، دەنى ساۋ، باقىتتى بولىپ ەرجەتسىن»، – دەدى مارات پاشيموۆ.
ول زاماناۋي مەديسينا – تەحنولوگيا مەن جوعارى دالدىكتەگى مەديسينالىق كومەك قانا ەمەس، ەڭ الدىمەن ءار بالانىڭ ءومىرى مەن دەنساۋلىعىنا دەگەن قامقورلىق ەكەنىن اتاپ ءوتتى.
2022-2025 جىلدارى ورتالىقتا 33 مىڭنان استام ءسابي دۇنيەگە كەلدى، 1،6 مىڭنان استام جاڭا تۋعان نارەستەگە جانساقتاۋ جانە قارقىندى تەراپيا بولىمدەرىندە مەديسينالىق كومەك كورسەتىلدى.
وتباسىلارمەن بىرگە ەگىلگەن 80 الما اعاشى ورتالىق اۋماعىنداعى جاڭا «نارەستەلەر اللەياسىنىڭ» نەگىزىن قالادى.
