الاتاۋ ءداستۇرلى ونەر تەاترىندا بەلگىلى قازاق اقىنى مارفۋعا ايتقوجانىڭ 90 جاس مەرەيتويىنا ارنالعان «جىر اققۋى – مارفۋعا» اتتى شىعارماشىلىق كەش ءوتتى، - دەپ حابارلايدى alnews.
مەرەيتوي يەسىن قۇتتىقتاۋعا جازۋشىلار، اقىندار، بەلگىلى ونەر قايراتكەرلەرى مەن شىعارماشىلىق زيالى قاۋىم وكىلدەرى جينالدى. ءىس-شارا الماتى اكىمدىگىنىڭ قولداۋىمەن ۇيىمداستىرىلدى.
مارفۋعا ايتقوجا – مەملەكەتتىك سىيلىقتىڭ لاۋرەاتى، قازاقستاننىڭ حالىق جازۋشىسى، قازاقستاننىڭ ەڭبەك سىڭىرگەن قايراتكەرى، الماتى قالاسىنىڭ قۇرمەتتى ازاماتى، «بارىس»، «پاراسات» جانە «قۇرمەت» وردەندەرىنىڭ يەگەرى. تۋعان جەر، ماحاببات، ادام سەزىمى مەن حالىق تاعدىرىن ارقاۋ ەتكەن شىعارمالارى قازاق پوەزياسىندا ايرىقشا ورىن الادى.
مەرەيتوي كەشىن ديريجەر جەكسەن ايسىننىڭ جەتەكشىلىگىمەن قۇرمانعازى اتىنداعى قازاق مەملەكەتتىك اكادەميالىق حالىق اسپاپتار وركەسترى اشتى. مۋزىكالىق قويىلىمدار اقىننىڭ ءومىرى مەن شىعارماشىلىعىن تانىستىرعان پوەزيالىق كومپوزيسيالارمەن الما-كەزەك ءورىلىپ وتىردى.
كەشتە قازاقستاننىڭ حالىق ءارتيسى شاحيماردان ءابىلوۆ، قازاقستاننىڭ ەڭبەك سىڭىرگەن قايراتكەرلەرى ماحمۇت تويكەنوۆ، گۇلزات داۋىربايەۆا، ادىلەت جەكسەنبي، تىلەبەك قوجان ۇلى، ەركىن شۇكىمان، قابىلاش ابىكەي ۇلى جانە حالىقارالىق بايقاۋلاردىڭ لاۋرەاتى نۇرسۇلتان سابيروۆ ونەر كورسەتتى.
باعدارلاماداعى ەرەكشە قويىلىمداردىڭ ءبىرى اكتەر بولات ءابدىلمانوۆ ورىنداعان «اباي اماناتى» مونولوگى بولدى. ال «الاتاۋ» تەاترىنىڭ ارتيستەرى «اققۋ جۇرەك» اتتى پوەزيالىق كومپوزيسيا ۇسىندى.
كەش قوناقتارىنىڭ قاتارىندا الماتى قالاسى اكىمىنىڭ ورىنباسارى ابزال نۇكەنوۆ پەن قازاقستان جازۋشىلار وداعى ءتوراعاسىنىڭ ورىنباسارى عالىم قاليبەك ۇلى بولدى. ولار اقىندى مەرەيتويىمەن قۇتتىقتادى.
كەش سوڭىندا مارفۋعا ايتقوجا كورەرمەندەرگە العىس ءبىلدىردى. سونداي-اق الماتى اكىمدىگىنە، ۇيىمداستىرۋشىلارعا، ونەر كورسەتكەن ارتيستەرگە جانە مەرەيتوي قۋانىشىن بىرگە بولىسۋگە كەلگەن بارشا قاۋىمعا ريزاشىلىعىن جەتكىزدى.
