الماتىدا LRT ءبىرىنشى جەلىسىنىڭ قۇرىلىسىنا دايىندىق جۇمىستارى جالعاسىپ جاتىر، - دەپ حابارلايدى alnews.
قازىرگى كەزەڭدە نەگىزگى جۇمىستار ب. مومىش ۇلى جانە تولە بي كوشەلەرىندە جۇرگىزىلۋدە. مۇندا جەلى وتەتىن اۋماقتى دايىنداۋ جانە قۇرىلىس ايماعىنا كىرەتىن ينجەنەرلىك كوممۋنيكاسيالاردى قايتا ورنالاستىرۋ جۇمىستارى قولعا الىنعان.
جوبا اياسىندا بارلىعى 375 ينجەنەرلىك جەلىنى، ونىڭ ىشىندە جىلۋ، بايلانىس، سۋمەن جابدىقتاۋ جانە كارىز، نوسەر كارىزى، گازبەن جانە ەلەكترمەن جابدىقتاۋ جەلىلەرىن قايتا ورنالاستىرۋ كوزدەلگەن.
ب. مومىش ۇلى كوشەسىندە، ونىڭ ىشىندە بولاشاق دەپو ورنالاساتىن اۋماقتا 39 ينجەنەرلىك كوممۋنيكاسيا قايتا ورنالاستىرىلادى. ءقازىر ونىڭ 4-ەۋى بويىنشا جۇمىس اياقتالعان. تولە بي كوشەسىندە 269 جەلىنى قايتا ورنالاستىرۋ قاجەت بولسا، ونىڭ 34ء-ى بويىنشا جۇمىستار اياقتالدى. ابىلاي حان داڭعىلىندا تاعى 67 ينجەنەرلىك جەلىنى قايتا ورنالاستىرۋ كوزدەلگەن.
سونىمەن قاتار ەسكى ترامۆاي رەلستەرى الىنىپپ، جولدىڭ ورتاڭعى ەكى جولاعىندا توپىراق قازۋ جۇمىستارى جۇرگىزىلدى. جۇمىستى ۇيىمداستىرۋدىڭ نەگىزگى قاعيداتى – شەتكى جولاقتاردا كولىك قوزعالىسىن ساقتاۋ. ينجەنەرلىك جەلىلەردى قايتا ورنالاستىرۋ قاجەت بولعان جاعدايدا جول قوزعالىسى قارسى باعىتتاعى ءبىر جولاق ارقىلى ۇيىمداستىرىلادى. مۇنداي جۇمىستارعا بايلانىستى كەيبىر ۋچاسكەلەردەگى شەكتەۋلەر، ادەتتە، بىر-ەكى كۇننەن اسپايدى.
ينجەنەرلىك جەلىلەردى قايتا ورنالاستىرۋ – LRT جەلىسى وتەتىن اۋماقتى دايىنداۋدىڭ قاجەتتى كەزەڭى. كەيبىر ۋچاسكەلەر بوساتىلعان سايىن جەلى قۇرىلىمدارىن ورناتۋ، شپال مەن رەلس توسەۋ جانە باسقا دا جۇمىستار باستالادى.
قۇرىلىس-مونتاج جۇمىستارى قىس مەزگىلىندە دە جالعاسادى. تەمپەراتۋرا تومەندەگەن كەزدە توپىراقتى قورعاۋ، قىسقى جاعدايدا بەتون قۇيۋ، قۇرىلىمداردى جىلىلاۋ جانە بەتوننىڭ قاجەتتى بەرىكتىككە جەتۋىن قامتاماسىز ەتۋگە باعىتتالعان ارنايى تەحنولوگيالىق شارالار قولدانىلادى.
جوبالىق شەشىمگە سايكەس، LRT ءبىرىنشى جەلىسىنىڭ ءبىرىنشى كەزەڭى الاتاۋ اۋدانىنداعى يندۋستريالىق ايماقتا، موڭكە بي جانە ب. مومىش ۇلى كوشەلەرىنىڭ ماڭىندا ورنالاساتىن دەپودان باستالادى. ودان ءارى جەلى ب. مومىش ۇلى كوشەسىمەن تولە بيگە، تولە بي كوشەسى ارقىلى شىعىس باعىتتا ابىلاي حان داڭعىلىنا، ودان ءارى «الماتى-2» تەمىرجول ۆوكزالىنا دەيىن جالعاسادى. سوڭعى ستانسيا رەتىندە «رايىمبەك باتىر» كولىك-اۋىسۋ تورابى قاراستىرىلعان.
LRT جەلىسىنىڭ ءبىرىنشى كەزەڭى تولىعىمەن جەرۇستى باعىتتا بولادى. جوبا اياسىندا ەستاكادا سالۋ جوسپارلانباعان، ال قولدانىستاعى كوپىر قۇرىلىمدارىن كۇشەيتۋ قاراستىرىلعان. LRT ىسكە قوسىلعاننان كەيىن ب. مومىش ۇلى جانە تولە بي كوشەلەرىندەگى جولدىڭ ورتاڭعى ەكى جولاعى تەك جەڭىل رەلستى پويىزداردىڭ قوزعالىسىنا بەرىلەدى. ولار جيەكتاستار ارقىلى وقشاۋلانادى. بۇل قوعامدىق كولىك قوزعالىسىنا باسىمدىق بەرىپ، ونىڭ جىلدامدىعى مەن تۇراقتىلىعىن ارتتىرۋعا جانە جول-كولىك وقيعالارىنىڭ ءقاۋپىن ازايتۋعا مۇمكىندىك بەرەدى.
LRT پويىزدارىنىڭ ەڭ جوعارى تەحنيكالىق جىلدامدىعى 65-70 كم/ساع بولادى. الايدا ايالدامالار اراسىنداعى ورتاشا قاشىقتىق شامامەن 700 مەتر بولعاندىقتان، پويىزداردىڭ ورتاشا قوزعالىس جىلدامدىعى 30-35 كم/ساع دەڭگەيىندە بولادى. ارنايى بولىنگەن جول قوعامدىق كولىكتىڭ ءقاۋىپسىز ءارى تۇراقتى قوزعالىسىن قامتاماسىز ەتەدى.
LRT ءبىرىنشى جەلىسىن 2027 جىلدىڭ سوڭىندا ىسكە قوسۋ جوسپارلانىپ وتىر. بۇل مەرزىم قاجەتتى كولەمدەگى جىلجىمالى قۇرامدى دايىنداۋ جانە جەتكىزۋ كەستەسىنە بايلانىستى وزگەرۋى مۇمكىن.
