الماتىدا اۆتوكولىكتەردەن بولىنەتىن زياندى شىعارىندىلاردى ازايتۋعا جانە اۋا ساپاسىن جاقسارتۋعا باعىتتالعان Low Emission Zone (LEZ) جوباسىن ەنگىزۋ بويىنشا پيلوتتىق جۇمىس جالعاسىپ جاتىر، - دەپ حابارلايدى alnews.
قىركۇيەك ايىنداعى مونيتورينگتىڭ ارالىق ناتيجەلەرى اۆتوكولىكتەردىڭ تەحنيكالىق جاي-كۇيىن جانە قابىلدانىپ جاتقان شارالاردىڭ تيىمدىلىگىن باعالاۋعا مۇمكىندىك بەرەدى.
وسى كەزەڭدە باقىلاۋ بەكەتتەرىندە 6833 اۆتوكولىك تەكسەرىلدى. ونىڭ 922-سىندە (13،5%) زياندى شىعارىندىلار دەڭگەيىنىڭ بەلگىلەنگەن نورمادان اسقانى انىقتالدى.
جانارماي جۇيەسىن رەتتەگەننەن كەيىن 561 اۆتوكولىك قايتا ولشەۋدەن ءساتتى ءوتتى. بۇل ۋاقىتىلى تەحنيكالىق قىزمەت كورسەتۋ مەن اۆتوكولىك جۇيەلەرىن دۇرىس رەتتەۋ زياندى شىعارىندىلار كولەمىن ازايتۋعا ىقپال ەتەتىنىن كورسەتەدى.
پيلوتتىق جوبا اۆتوكولىكتەردىڭ تەحنيكالىق جاي-كۇيى تۋرالى دەرەكتەر جيناۋعا، ماسەلەنىڭ اۋقىمىن باعالاۋعا جانە زياندى شىعارىندىلاردى ازايتۋدىڭ الداعى تاسىلدەرىن ايقىنداۋعا مۇمكىندىك بەرەدى.
مامانداردىڭ مالىمەتىنشە، الماتىداعى اۋا لاستانۋىنىڭ شامامەن 70%-ى اۆتوكولىكتەردەن شىعاتىن زياندى زاتتارعا بايلانىستى. وسىعان وراي كولىك شىعارىندىلارىن باقىلاۋ جانە جۇرگىزۋشىلەردىڭ ەكولوگيالىق جاۋاپكەرشىلىگىن ارتتىرۋ قالاداعى اۋا ساپاسىن جاقسارتۋدىڭ نەگىزگى باعىتتارىنىڭ ءبىرى سانالادى.
قازىرگى كەزەڭدە جوبا پيلوتتىق رەجيمدە جۇمىسىن جالعاستىرىپ جاتىر. جينالعان دەرەكتەر الداعى تالداۋ جۇمىستارى مەن ءتيىستى شەشىمدەر ازىرلەۋ ءۇشىن پايدالانىلادى. جوبا اياسىندا قالاعا كىرۋگە شەكتەۋ ەنگىزۋ، ايىپپۇل سالۋ نەمەسە جول ءجۇرۋ اقىسىن الۋ كوزدەلمەگەن. پيلوتتىق جوبا بيىلعى جىلدىڭ سوڭىنا دەيىن جالعاسادى.
