الماتىدا تۇرعىندار مەن قالا ينفراقۇرىلىمى نىساندارىنا جوعارى ءقاۋىپ توندىرگەن كوشكىن ءقاۋپى ەڭ جوعارى توعىز ۋچاسكەدە بەتكەيلەردى نىعايتۋ جۇمىستارى اياقتالدى، - دەپ حابارلايدى alnews.
مەدەۋ اۋدانىندا «مەدەۋ» بيىك تاۋلى مۇز ايدىنى ماڭىنداعى بەتكەي، «شىمبۇلاق» تاۋ شاڭعىسى كۋرورتىنا باراتىن اۆتوجول ۋچاسكەسى، «كەڭساي-2» زيراتىنا اپاراتىن جول، سونداي-اق «مەدەۋ» بيىك تاۋلى سپورت كەشەنى اۋماعىنداعى «سارىساي» بوگەتىنە اپاراتىن ەۆاكۋاسيالىق جول بويىنداعى بەتكەيلەر نىعايتىلدى.
سونداي-اق، جەتىسۋ اۋدانىنداعى ءۇش ۋچاسكەدە – قوجامياروۆ كوشەسىندە، پاللادين كوشەسىنىڭ بويىندا جانە «كەمەل» زيراتى اۋماعىندا جۇمىستار جۇرگىزىلدى. ناۋرىزباي اۋدانىندا «مەدەۋ» تۇتىنۋ كووپەراتيۆىندەگى ۋسيكوۆ كوشەسىنىڭ بويىنداعى ۋچاسكە مەن «اقجارتاۋ» باۋ-باقشا سەرىكتەستىگىنە كىرەبەرىس جولداعى بەتكەيلەر بەكىتىلدى.
بەتكەيلەردى نىعايتۋ جۇمىستارى 2025 جىلعى قازاندا تابيعي سيپاتتاعى توتەنشە جاعدايدىڭ سالدارىن جويۋ جونىندەگى ءىس-شارالار اياسىندا باستالدى. بۇگىندە ينجەنەرلىك جۇمىستار تولىق كولەمدە اياقتالىپ، اۋماقتاردى كوركەيتۋ جۇمىستارى اياقتالىپ كەلەدى. قابىلدانعان ينجەنەرلىك شەشىمدەردىڭ ارقاسىندا اتالعان اۋماقتاردا كوشكىن ۇدەرىستەرىنىڭ تۋىنداۋ ءقاۋپى ەداۋىر تومەندەدى.
سونىمەن قاتار قالادا ىقتيمال ءقاۋىپتى بەتكەيلەردى تەكسەرۋ جۇمىستارى جالعاسۋدا. بيىل جۇمىلدىرۋ دايىندىعى، اۋماقتىق جانە ازاماتتىق قورعانىس باسقارماسىنىڭ، الماتى قالاسى توتەنشە جاعدايلار دەپارتامەنتىنىڭ، «قازسەلدەنقورعاۋ» مەملەكەتتىك مەكەمەسىنىڭ، گەوگرافيا جانە سۋ قاۋىپسىزدىگى ينستيتۋتىنىڭ جانە اۋدان اكىمدىكتەرىنىڭ ماماندارىنان قۇرالعان جۇمىس توبى كوشكىن ۇدەرىستەرىنىڭ دامۋ ءقاۋپى جوعارى تاعى جەتى ۋچاسكەنى انىقتادى. قازىرگى ۋاقىتتا ولار بويىنشا جوبالىق شەشىمدەر ازىرلەنىپ جاتىر. ودان كەيىن بەتكەيلەردى بەكىتۋ جۇمىستارى جۇرگىزىلەدى.
سەل، كوشكىن جانە قار كوشكىنى ءقاۋپى بار ۋچاسكەلەردە توتەنشە جاعدايدىڭ الدىن الۋ ماقساتىندا اقپاراتتىق-ەسكەرتۋ قالقاندارى ورناتىلىپ جاتىر. سونىمەن قاتار تۇرعىندار مەن تۋريستەرگە قولايسىز اۋا رايى تۋرالى SMS-حابارلاما ارقىلى جەدەل اقپارات بەرىلەدى. ءقاۋىپ دەڭگەيى جوعارى كەزەڭدە شىمبۇلاق ماڭىنا جانە ۇلكەن الماتى كولىنە، كەيبىر تاۋ باعىتتارىنا بارۋعا ۋاقىتشا شەكتەۋ ەنگىزىلەدى.
