الماتىدا كورىكتەندىرۋ قاعيدالارىنىڭ ساقتالۋىنا باقىلاۋ كۇشەيتىلدى

الماتىدا قالانىڭ كورىكتەندىرۋ قاعيدالارىنىڭ ساقتالۋىن باقىلاۋ جۇمىستارى جالعاسۋدا. جىل باسىنان بەرى زاڭدى تۇلعالار 8 972 كورىكتەندىرۋ ءتولقۇجاتىن راسىمدەپ، جوسپارلى كورسەتكىشتەن اسىپ ءتۇستى. بۇل تۋرالى قالالىق كوممۋنالدىق ينفراقۇرىلىم جانە تۇرعىن ءۇي ينسپەكسياسى باسقارماسىنىڭ وكىلدەرى ايتتى.
 
كورىكتەندىرۋ ءتولقۇجاتى – مەنشىك يەسى نەمەسە پايدالانۋشىنىڭ وزىنە تيەسىلى نىسانعا ىرگەلەس اۋماقتى كۇتىپ ۇستاۋعا جاۋاپتى ەكەنىن راستايتىن قۇجات.
 
بيىلعى جىلدىڭ العاشقى جارتىجىلدىعىندا باسقارما ماماندارى 5 مىڭعا جۋىق اۋىزشا ەسكەرتۋ جاساپ، اكىمشىلىك قۇقىق بۇزۋشىلىق تۋرالى كودەكستىڭ 505-بابى بويىنشا 9 679 اكىمشىلىك ماتەريال راسىمدەدى. سالىنعان ايىپپۇلداردىڭ جالپى سوماسى 111،9 ملن تەڭگە بولدى.
 
قالا اكىمىنىڭ تاپسىرماسىمەن كورىكتەندىرۋ ءتولقۇجاتىن راسىمدەۋ ناۋقانى قايتا جاندانعاننان كەيىن قوسىمشا 672 پاسپورت بەرىلدى. وسى كەزەڭدە 547 اكىمشىلىك ماتەريال راسىمدەلىپ، سالىنعان ايىپپۇلداردىڭ جالپى سوماسى 12،7 ملن تەڭگەدەن استى.
 
باسقارما وكىلدەرىنىڭ ايتۋىنشا، بۇل شارالار نىسان يەلەرىنىڭ جاۋاپكەرشىلىگىن ارتتىرىپ، قالا اۋماعىندا تازالىق پەن ءتارتىپتى ساقتاۋعا باعىتتالعان.