الماتىنىڭ بوستاندىق اۋدانى اكىمدىگىندە قالانىڭ اتموسفەرالىق اۋانى قورعاۋ قاعيدالارىن ىسكە اسىرۋ اياسىندا شاعىن جانە ورتا بيزنەس وكىلدەرىمەن كەزەكتى ءاقپاراتتىق-تۇسىندىرۋ كەزدەسۋى ءوتتى، - سووبششاەت alnews.
«Eco Almaty» ج ش س ماماندارى كاسىپكەرلەرگە جاڭا ەكولوگيالىق تالاپتار، گازداندىرىلعان اۋدانداردا قاتتى وتىننان كەزەڭ-كەزەڭىمەن باس تارتۋ، شىعارىندىلاردى تازارتۋ جۇيەلەرىن ورناتۋ قاجەتتىلىگى، سونداي-اق تومەن ەميسسيالى ايماقتىڭ (LEZ) پيلوتتىق جوباسىن ىسكە اسىرۋ جونىندە ءتۇسىندىرۋ جۇمىستارىن جۇرگىزدى.
كەزدەسۋ بارىسىندا بوستاندىق اۋدانىنداعى ەكولوگيالىق احۋالعا ەرەكشە نازار اۋدارىلدى. بۇگىندە ەكولوگتار تەكسەرگەن نىسانداردىڭ ۇشتەن بىرىنە جۋىعى ءالى دە قاتتى وتىندى پايدالانىپ كەلەدى. ونىڭ ىشىندە 52 قوعامدىق تاماقتانۋ ورنى، 8 مونشا كەشەنى جانە 1 اۆتوسەرۆيس بار. جالپى اۋداندا شاعىن جانە ورتا بيزنەسكە تيەسىلى 202 نىسان تەكسەرىلدى. ونىڭ ىشىندە 62 اۆتوسەرۆيس، 103 قوعامدىق تاماقتانۋ ورنى جانە 37 مونشا كەشەنى قامتىلدى. اتالعان نىسانداردان اتموسفەراعا جىل سايىن 617 توننادان استام لاستاۋشى زاتتار شىعارىلادى. بۇل دەرەكتەر كاسىپكەرلەرمەن الداعى ءتۇسىندىرۋ جۇمىستارىن جۇرگىزۋگە نەگىز بولدى.
