الماتىدا قالا شارۋاشىلىعىن 2026-2027 جىلدارداعى جىلىتۋ ماۋسىمىنا دايىنداۋ جۇمىستارى جالعاسىپ كەلەدى، - دەپ حابارلايدى alnews.
الماتى اكىمى دارحان ساتىبالدىنىڭ توراعالىعىمەن وتكەن كەڭەستە جۇمىس بارىسى تالقىلاندى. كوممۋنالدىق جانە ەنەرگەتيكالىق كاسىپورىندار بەكىتىلگەن كەستەگە سايكەس ءتيىستى ءىس-شارالاردى ورىنداۋدا.
اسىرەسە، تۇرعىن ءۇي قورى مەن الەۋمەتتىك نىساندارعا ەرەكشە نازار اۋدارىلىپ وتىر. بۇگىندە كوپپاتەرلى تۇرعىن ۇيلەردىڭ باسىم بولىگى قىسقا دايىن. ءبىلىم بەرۋ مەن دەنساۋلىق ساقتاۋ نىساندارىنداعى دايىندىق جۇمىستارى دا تولىق اياقتالعان.
جىلۋ كوزدەرى مەن ينجەنەرلىك جەلىلەردە گيدراۆليكالىق سىناقتار جۇرگىزىلىپ، اعىمداعى جوندەۋ جانە جاڭعىرتۋ جۇمىستارى جالعاسۋدا. بيىل 20 شاقىرىمنان استام جىلۋ جەلىسىن جاڭارتۋ جوسپارلانعان. سونىمەن قاتار جىلۋ وقشاۋلاعىشتارى اۋىستىرىلىپ، نەگىزگى جابدىقتار قىسقى جۇكتەمەگە دايىنداۋ كوزدەلگەن.
قالالىق جىلۋ كوزدەرىندە نەگىزگى جابدىقتار جوندەلىپ، قاجەتتى وتىن قورى جاساقتالىپ جاتىر. جوسپارلانعان ءىس-شارالاردىڭ باسىم بولىگى ورىندالدى. قازاندىقتار دايىندىقتىڭ سوڭعى كەزەڭىنەن ءوتىپ، ىسكە قوسۋ-باپتاۋ جۇمىستارى قولعا الىنعان.
سونداي-اق، ەلەكتر ينفراقۇرىلىمىن جاڭعىرتۋ جۇمىستارى دا جالعاسىپ جاتىر. ەلەكتر بەرۋ جەلىلەرى، قوسالقى ستانسيالار مەن ترانسفورماتورلىق جابدىقتار جاڭارتىلۋدا. گازبەن، سۋمەن جابدىقتاۋ جانە سۋ بۇرۋ جۇيەلەرىندە دە جوسپارلى جۇمىستار جۇرگىزىلۋدە.
قالانىڭ تىرشىلىگىن قامتاماسىز ەتەتىن وزگە دە جۇيەلەردى دايىنداۋ جالعاسۋدا. گاز قۇبىرلارىنىڭ جوسپارلانعان ۋچاسكەلەرىن قايتا جاڭعىرتۋ جۇمىستارى اياقتالۋعا جاقىن، جابدىقتارعا تەحنيكالىق قىزمەت كورسەتىلۋدە. سۋمەن جابدىقتاۋ جانە سۋ بۇرۋ جۇيەلەرىندە دە ينجەنەرلىك جەلىلەردى قايتا جاڭعىرتۋ جۇمىستارى جۇرگىزىلىپ جاتىر.
كوممۋنالدىق جانە ەنەرگەتيكالىق كاسىپورىندار سۋىق تۇسكەنگە دەيىن قىس مەزگىلىندە قالا ينفراقۇرىلىمىنىڭ تۇراقتى جۇمىسىن قامتاماسىز ەتۋ ءۇشىن قالعان جوندەۋ جانە ىسكە قوسۋ-باپتاۋ جۇمىستارىن اياقتاۋعا ءتيىس.
