الماتىنىڭ بيۋدجەتىن ناقتىلاۋ بارىسىندا كولىك ينفراقۇرىلىمىن دامىتۋعا جەكە باعىت قاراستىرىلعان. بۇل تۋرالى ءماسليحات وتىرىسىندا الماتى قالاسى ەكونوميكا جانە قارجى باسقارماسىنىڭ باسشىسى باۋىرجان قۇدايبەرگەنوۆ مالىمدەدى.
2026 جىلدىڭ سوڭىنا دەيىن «قالقامان» مەترو بەكەتىن پايدالانۋعا بەرۋ جوسپارلانىپ وتىر. سونداي-اق بيىل «قالقامان» بەكەتىنەن «بارلىق» بەكەتىنە دەيىنگى مەترو جەلىسىنىڭ قۇرىلىسى باستالدى.
مەترو جەلىسىن ودان ءارى كەڭەيتۋ ءۇشىن «جىبەك جولى» بەكەتىنەن اۋەجايعا دەيىنگى ەكىنشى جەلىنىڭ جوبالاۋ-سمەتالىق قۇجاتتاماسى ازىرلەنەدى.
جول ينفراقۇرىلىمى سالاسىندا رىسقۇلوۆ داڭعىلىن قالا شەكاراسىنا دەيىن ۇزارتۋ قۇرىلىسى، مۇقانوۆ كوشەسىن گوگول كوشەسىنەن رايىمبەك داڭعىلىنا دەيىن جانە رايىمبەك داڭعىلىن شىعىس اينالما اۆتوموبيل جولىنا دەيىن ۇزارتۋ جۇمىستارى جالعاسادى.
جىل سوڭىنا دەيىن اقجار جانە تەرەكتى شاعىناۋداندارىنداعى جول قۇرىلىسىن اياقتاۋ جوسپارلانعان. سونداي-اق «باتىس قاقپا» پوليورتالىعىندا جولدار مەن ينجەنەرلىك كوممۋنيكاسيالاردىڭ قۇرىلىسى جالعاسادى.
قوعامدىق كولىكتى، ونىڭ ىشىندە اۆتوبۋس تاسىمالدارى مەن مەتروپوليتەندى سۋبسيديالاۋعا دا قوسىمشا قاراجات قاراستىرىلعان.
باۋىرجان قۇدايبەرگەنوۆتىڭ ايتۋىنشا، بيۋدجەتتى قازىرگى ناقتىلاۋ ەڭ الدىمەن قالانىڭ باستى ماسەلەلەرىن شەشۋگە جانە باستالعان جوبالاردى اياقتاۋعا باعىتتالعان.
