الماتىنىڭ بيۋدجەتى ناقتىلانعان كەزدە قاراجاتتىڭ ەداۋىر بولىگى الەۋمەتتىك ينفراقۇرىلىمدى دامىتۋعا باعىتتالادى. بۇل تۋرالى ءماسليحات وتىرىسىندا الماتى قالاسى ەكونوميكا جانە قارجى باسقارماسىنىڭ باسشىسى باۋىرجان قۇدايبەرگەنوۆ مالىمدەدى.
اۋەزوۆ اۋدانىندا ەكى مەكتەپتىڭ قۇرىلىسى جالعاسادى. 11-شاعىناۋدانداعى 1 200 ورىندىق مەكتەپتى جىل سوڭىنا دەيىن اياقتاپ، پايدالانۋعا بەرۋ جوسپارلانعان. سونىمەن قاتار №158 مەكتەپتىڭ قازىرگى عيماراتىن بۇزىپ، ونىڭ ورنىنا 900 ورىندىق جاڭا مەكتەپ سالۋ كوزدەلىپ وتىر. اقساي-2 شاعىناۋدانىنداعى №42 مەكتەپتى قايتا جاڭعىرتۋ جۇمىستارى دا جالعاسادى.
الاتاۋ اۋدانىنداعى دارابوز شاعىناۋدانىندا 900 ورىندىق مەكتەپ اشۋ ءۇشىن عيمارات ساتىپ الۋ جوسپارلانعان. ال المالى اۋدانىندا بيىل 240 ورىندىق بالاباقشانىڭ قۇرىلىسى اياقتالادى.
سونداي-اق، «كەلەشەك مەكتەپتەرى» ۇلتتىق جوباسى اياسىندا بيىل پايدالانۋعا بەرىلگەن سەگىز جاڭا مەكتەپتىڭ تولىققاندى جۇمىس ىستەۋىنە قاجەتتى قاراجات قاراستىرىلعان. سونىڭ ناتيجەسىندە قالاداعى وقۋشى ورىندارىنىڭ تاپشىلىعىن 11،7 مىڭ ورىنعا دەيىن ازايتۋ كوزدەلىپ وتىر.
دەنساۋلىق ساقتاۋ سالاسىندا اباي داڭعىلى، 69 مەكەنجايىندا ورنالاسقان وقۋ-كلينيكالىق ورتالىقتىڭ اپاتتى جاعدايداعى عيماراتىن بالالاردى وڭالتۋ جونىندەگى قالالىق ورتالىققا بەيىمدەپ قايتا جاڭعىرتۋ جۇمىستارى باستالادى.
شۇعىلا شاعىناۋدانىندا ءبىر اۋىسىمدا 200 ادام قابىلدايتىن دارىگەرلىك امبۋلاتوريانىڭ قۇرىلىسى جالعاسادى. نىساندى جىل سوڭىنا دەيىن پايدالانۋعا بەرۋ جوسپارلانعان.
بۇدان بولەك، سۇرانىسقا يە مەديسينالىق ماماندىقتار بويىنشا 120 رەزيدەنت دايارلاۋعا قاراجات قاراستىرىلعان.
سپورت سالاسىندا تۇركسىب اۋدانىنداعى دەنە شىنىقتىرۋ-ساۋىقتىرۋ كەشەنىنىڭ قۇرىلىسى جالعاسادى.
