الماتىدا 2026 جىلى العاشقى توعىز ايدا قالالىق جۇمىسپەن قامتۋ باعدارلامالارىنىڭ كومەگىمەن 21،7 مىڭ جاس جۇمىسقا ورنالاستى، - دەپ حابارلايدى alnews.
ولاردىڭ 3،9 مىڭى NEET ساناتىنداعى جاستار بولسا، تاعى 9،6 مىڭى جاڭا كاسىبي داعدى مەڭگەردى. جۇمىس ىستەمەيتىن، وقىمايتىن جانە كاسىبي دايارلىقتان وتپەيتىن جاستارعا، ياعني NEET ساناتىنا ەرەكشە كوڭىل بولىنەدى. بۇل تۋرالى الماتى قالاسى جاستار ساياساتى باسقارماسىنىڭ وكىلدەرى حابارلادى.
ءبىرىنشى جارتىجىلدىقتىڭ قورىتىندىسى بويىنشا الماتىداعى NEET ساناتىنداعى جاستاردىڭ ۇلەسى 2025 جىلعى 5،8%-دان 4،8%-عا دەيىن تومەندەدى. بۇل ساناتقا شامامەن 33،6 مىڭ ادام جاتادى. ال جاستار اراسىنداعى جۇمىسسىزدىق دەڭگەيى وسى كەزەڭدە 3،8% بولدى. سالىستىرۋ ءۇشىن، 2024 جىلى بۇل كورسەتكىش 4،4% بولعان.
الماتىدا 14 پەن 35 جاس ارالىعىنداعى 769 مىڭ جاس تۇرادى. ونىڭ ىشىندە 332،6 مىڭى جالدامالى جۇمىستا ىستەيدى، 34 مىڭى ءوزىن-وزى جۇمىسپەن قامتىعان. جوعارى وقۋ ورىندارىندا 232،8 مىڭ، كوللەدجدەردە 89،6 مىڭ جاس ءبىلىم الىپ جاتىر.
جاستاردىڭ جۇمىسقا ورنالاسۋىنا كومەكتەسۋ ءۇشىن قالالىق جاستاردىڭ مانساپ ورتالىعى جۇمىس ىستەيدى. مۇندا جۇمىس بەرۋشىلەرمەن كەزدەسۋلەر، بوس جۇمىس ورىندارى جارمەڭكەلەرى، تاعىلىمدامالار مەن ەڭبەك جولىن ەندى باستاعان جاستارعا ارنالعان تاجىريبەلىك باعدارلامالار ۇيىمداستىرىلادى.
ورتالىقتىڭ كومەگىمەن 4 مىڭ ادام جۇمىسقا ورنالاستى. ولاردىڭ 1،2 مىڭى – NEET ساناتىنداعى جاستار. بۇدان بولەك، الماتىنىڭ 2،1 مىڭ جاس تۇرعىنى ۋاقىتشا جۇمىس ورىندارىنا ورنالاستىرىلدى.
كاسىبي دايارلىققا باعىتتالعان باستامالاردىڭ ءبىرى Skill All جوباسى. ونىڭ اياسىندا ماركەتينگ، IT، جۇمىسشى ماماندىقتارى جانە قىزمەت كورسەتۋ سالالارى بويىنشا ءبىلىم الۋعا بولادى. كۇندىزگى كۋرستاردان 2 مىڭ ادام، ال قاشىقتان وقىتۋ باعدارلامالارىنان 7،6 مىڭ ادام ءوتتى. قازىرگى ۋاقىتتا ونلاين فورماتتا 92 وقۋ باعدارلاماسى قولجەتىمدى.
بوس جۇمىس ورىندارى مەن قولداۋ شارالارى تۋرالى اقپاراتتى Jasalmaty.kz سيفرلىق پلاتفورماسىنان تابۋعا بولادى. پلاتفورمانى 25 مىڭ بىرەگەي پايدالانۋشى قولدانعان. ءقازىر وندا 1،3 مىڭعا جۋىق بوس جۇمىس ورنى ۇسىنىلعان.
جۇمىسقا ورنالاسۋدا قيىندىقتارعا تاپ بولعان جاستارمەن جەكە جۇمىس تا جۇرگىزىلەدى. ماماندار ولاردىڭ قاجەتتىلىگىن انىقتاۋ ءۇشىن 10 مىڭ اداممەن بايلانىس ورناتقان. ولاردىڭ 1 681ء-ى جۇمىس ىزدەۋگە كومەككە مۇقتاج بولسا، ال 421 ۇمىتكەرگە جەكە قولداۋ كورسەتىلىپ جاتىر.
جاستار ساياساتى باسقارماسىنىڭ مالىمەتىنشە، نەگىزگى ماسەلەلەردىڭ ءبىرى كوللەدجدەر مەن جوعارى وقۋ ورىندارىنىڭ تۇلەكتەرىندە ەڭبەك تاجىريبەسىنىڭ بولماۋى جانە العان ماماندىعىنىڭ جۇمىس بەرۋشىلەر تالاپتارىنا سايكەس كەلمەۋى. سوندىقتان جاستارعا بوس جۇمىس ورىندارىن ۇسىنۋمەن قاتار، تاعىلىمدامادان وتۋگە، قىسقا مەرزىمدى كۋرستارعا قاتىسۋعا جانە العاشقى كاسىبي تاجىريبە جيناۋعا مۇمكىندىك بەرىلەدى.
