الماتىدا جول قوزعالىسىن ۇيىمداستىرۋ، اۆتوتۇراق كەڭىستىگىن باسقارۋ جانە ەلەكتر ساموكاتتاردى رەتتەۋ جۇيەسىن رەفورمالاۋعا باعىتتالعان جاڭا قاعيدالار جوباسى قاراۋعا ۇسىنىلدى، - دەپ حابارلايدى alnews.
باستامالار جولدارداعى جۇكتەمەنى ازايتۋعا، قاۋىپسىزدىكتى ارتتىرۋعا جانە قالا تۇرعىندارى ءۇشىن قولايلى ورتا قالىپتاستىرۋعا باعىتتالعان.
جوباداعى نەگىزگى جاڭاشىلدىقتاردىڭ ءبىرى – جاقىن ماڭداعى تۇرعىن ۇيلەردىڭ تۇرعىندارىنا اۆتوتۇراقتاردى تەگىن پايدالانۋ مۇمكىندىگىن بەرۋ. قۇجاتقا سايكەس تۇرعىندار وزدەرىنىڭ تۇرعىلىقتى جەرىنەن 500 مەتر راديۋستا ورنالاسقان اۆتوتۇراقتا ءبىر كولىك قۇرالى ءۇشىن ءبىر جىل مەرزىمگە تەگىن پايدالانۋ رۇقساتىن راسىمدەي الادى. بۇل رەتتە يەسىنە ناقتى ءبىر تۇراق ورنى بەكىتىلمەيدى.
سونداي-اق اقىلى اۆتوتۇراقتاردى پايدالانعانى ءۇشىن تولەمنەن بوساتىلاتىن ازاماتتار ساناتىن كەڭەيتۋ ۇسىنىلۋدا. ولاردىڭ قاتارىنا ارداگەرلەر، مۇگەدەكتىگى بار ادامدار، كوپبالالى انالار، يادرولىق سىناقتاردان زارداپ شەككەن ازاماتتار جانە ەلەكتر كولىكتەرىنىڭ يەلەرى ەنگىزىلۋى مۇمكىن. تولەمنەن بوساتۋ قۇقىعى مەنشىك يەسىنىڭ تاڭداۋى بويىنشا ءبىر كولىك قۇرالىنا عانا قولدانىلادى.
جوبا اياسىندا اۆتوتۇراق پايدالانۋشىلارى ءۇشىن تەگىن ۋاقىت ارالىقتارىن ەنگىزۋ دە كوزدەلگەن. اتاپ ايتقاندا، تروتۋار بويىنداعى اۆتوتۇراقتاردا بەس مينۋتقا دەيىن، ال الاڭدىق اۆتوتۇراقتاردان شىعۋ كەزىندە ون مينۋتقا دەيىن تەگىن ۋاقىت بەرۋ ۇسىنىلادى.
جەكە موبيلدىلىك قۇرالدارىن، ونىڭ ىشىندە ەلەكتر ساموكاتتاردى رەتتەۋگە دە ەرەكشە نازار اۋدارىلعان. قالادا ولاردى ورنالاستىرۋعا ارنالعان ارنايى ايماقتاردى ەنگىزۋ جوسپارلانۋدا. ەلەكتر ساموكاتتاردى تەك ارنايى تاڭبالانعان ورىنداردا قالدىرۋعا رۇقسات ەتىلەدى. جاياۋ جۇرگىنشىلەردىڭ قوزعالىسىنا كەدەرگى كەلتىرەتىن رەتسىز تۇراققا قويۋعا تىيىم سالىنۋى مۇمكىن.
جوبا ازىرلەۋشىلەرىنىڭ پىكىرىنشە، ۇسىنىلىپ وتىرعان شارالار رەتسىز اۆتوتۇراقتاردى ازايتۋعا، كوشەلەردىڭ وتكىزۋ قابىلەتىن ارتتىرۋعا، تۇراق ورىندارىنىڭ قولجەتىمدىلىگىن جاقسارتۋعا جانە قوعامدىق كولىكتىڭ دامۋىن ىنتالاندىرۋعا مۇمكىندىك بەرەدى.
