الماتىدا جەرگىلىكتى ماڭىزى بار تاريح جانە مادەنيەت ەسكەرتكىشتەرىنىڭ ءتىزىمىن كەڭەيتۋ جوسپارلانىپ وتىر، - دەپ حابارلايدى alnews.
ارنايى كوميسسيا تاريحي، ساۋلەتتىك جانە مادەني قۇندىلىعى بار تۇرعىن ۇيلەر مەن قوعامدىق عيماراتتاردى زەردەلەۋگە كىرىستى. ءبىرىنشى كەزەڭدە زەرتتەۋ ءۇشىن 27 نىسان ىرىكتەلدى.
ولاردىڭ قاتارىندا Satbayev University باس وقۋ عيماراتى، ءال-فارابي اتىنداعى قازۇۋ رەكتوراتى، ۇلتتىق بانك عيماراتى، ابىلاي حان داڭعىلىنداعى بۇرىنعى ۇكىمەت ءۇيى، ورتالىق مادەنيەت جانە دەمالىس ساياباعىنىڭ اركاسى، ورتالىق امبەباپ دۇكەننىڭ ەسكى عيماراتى، چايكوۆسكيي اتىنداعى الماتى كوللەدجى، گەولوگيا عىلىمدارى ينستيتۋتى، اكۋشەرلىك، گينەكولوگيا جانە پەريناتولوگيا عىلىمي ورتالىعى، كيروۆ اتىنداعى زاۋىتتىڭ تۇرعىن ۇيلەرى، نۇرعيسا تىلەندييەۆ پەن دىنمۇحامەد قونايەۆتىڭ مەموريالدىق مۋزەيلەرى، «اتاكەنت» كىرەبەرىس اركاسى جانە رەسپۋبليكا الاڭى بار.
كوميسسيا وسى عيماراتتار مەن قۇرىلىستاردىڭ جاي-كۇيىن زەرتتەپ، قاي نىساندى جەرگىلىكتى ماڭىزى بار ەسكەرتكىشتەر تىزىمىنە ەنگىزۋگە ۇسىنۋعا بولاتىنىن انىقتايدى.
بۇگىندە الماتىدا 160 تاريح جانە مادەنيەت ەسكەرتكىشى مەملەكەت قورعاۋىنا الىنعان. ونىڭ 34ء-ى رەسپۋبليكالىق، 126-سى جەرگىلىكتى ماڭىزعا يە.
ەسكەرتكىشتەردىڭ باسىم بولىگى ساۋلەت جانە قالا قۇرىلىسى نىساندارىنا جاتادى. ولاردىڭ سانى – 91. تاعى 50 نىسان مونۋمەنتالدى ونەرگە، 12ء-سى ارحەولوگياعا قاتىستى. بەس نىسان انسامبلدەر مەن كەشەندەر قاتارىنا كىرسە، ەكەۋى كيەلى ورىن سانالادى.
ەسكەرتكىشتەردىڭ دەنى مەدەۋ جانە المالى اۋداندارىندا ورنالاسقان. اتاپ ايتقاندا، مەدەۋ اۋدانىندا 65، المالى اۋدانىندا 50 نىسان بار.
تاريحي عيماراتتار مەن قۇرىلىستاردى ساقتاۋ ءۇشىن ولاردىڭ اينالاسىندا قۇرىلىس جۇرگىزۋگە شەكتەۋ قويىلاتىن قورعاۋ ايماقتارى بەلگىلەنەدى. بۇل تالاپتار ەسكەرتكىشتەردىڭ ءوزىن عانا ەمەس، اينالاسىنداعى تاريحي قۇرىلىس نىساندارىن دا ساقتاۋعا مۇمكىندىك بەرەدى.
