الماتى تۇرعىندارى 11 تامىزدان باستاپ قازاقستاندا العاش رەت جۇزەگە اسىرىلىپ وتىرعان «جاستار قاتىساتىن بيۋدجەت» جوباسى اياسىندا ۇسىنىلعان جوبالارعا داۋىس بەرە الادى، - دەپ حابارلايدى alnews.
داۋىس بەرۋ قورىتىندىسى بويىنشا قارجىلاندىرىلىپ، قالادا جۇزەگە اسىرىلاتىن باستامالار انىقتالادى. بۇل تۋرالى الماتى جاستار ساياساتى باسقارماسىنىڭ وكىلدەرى حابارلادى.
بايقاۋعا بارلىعى 203 ءوتىنىم كەلىپ تۇسكەن. الدىن الا ىرىكتەۋ مەن ساراپتامالىق باعالاۋدان كەيىن داۋىس بەرۋگە 122 جوبا جىبەرىلدى.
باستامالاردىڭ دەنى الەۋمەتتىك سالاعا قاتىستى — 35 جوبا. IT جانە سيفرلاندىرۋ باعىتىندا — 30، ءبىلىم بەرۋ سالاسىندا — 21 جوبا ۇسىنىلعان. سونىمەن قاتار داۋىس بەرۋگە مادەنيەت، ەكولوگيا، دەنساۋلىق ساقتاۋ، سپورت جانە ينفراقۇرىلىم باعىتتارىنداعى جوبالار دا شىعارىلدى.
«ءبىز العاش رەت جاستار قوعامدىق ءومىردىڭ جاي عانا قاتىسۋشىسى ەمەس، قالاداعى وزگەرىستەردىڭ تولىققاندى اۆتورى بولاتىن جۇيە قۇرىپ وتىرمىز. بايقاۋعا ۇسىنىلعان ءار يدەيا — جاس الماتىلىقتاردىڭ قالانى دامىتۋعا قوسقان ۇلەسى. ەندى قانداي جوبالار ءبىرىنشى كەزەكتە جۇزەگە اساتىنىن تۇرعىنداردىڭ وزدەرى انىقتايدى. مۇنداي ءتاسىل جاۋاپكەرشىلىك، سەنىم جانە شەشىمدەردى بىرلەسىپ قابىلداۋ مادەنيەتىن قالىپتاستىرادى»، — دەدى «جاستار قاتىساتىن بيۋدجەت» جوباسىنىڭ جەتەكشىسى سامارحان ابدۋعالييەۆ.
جوبا جاس الماتىلىقتارعا قالالىق ورتانى دامىتۋ بويىنشا يدەياسىن ۇسىنۋعا جانە بيۋدجەت قاراجاتى ەسەبىنەن جۇزەگە اسىرىلاتىن باستامالاردى تاڭداۋعا قاتىسۋعا مۇمكىندىك بەرەدى.
ونلاين داۋىس بەرۋ 18 تامىزعا دەيىن جالعاسادى. تۇرعىنداردىڭ ەڭ كوپ قولداۋىنا يە بولعان جوبالار جەڭىمپاز اتانادى.
