الماتىدا «جاستار قاتىساتىن بيۋدجەت – 2026» جوباسى اياسىنداعى ونلاين داۋىس بەرۋ اياقتالدى، - دەپ حابارلايدى alnews.
10 مىڭعا جۋىق داۋىس جاستاردىڭ ءبىلىم بەرۋ، ەكولوگيا، تەحنولوگيا، الەۋمەتتىك قولداۋ، دەنساۋلىق ساقتاۋ جانە قالالىق ورتا باعىتتارىنداعى ۇزدىك جوبالارىن انىقتاۋعا مۇمكىندىك بەردى.
جوبانىڭ باستى ماقساتى – جاستاردى الماتىنىڭ دامۋىنا قاتىستى شەشىم قابىلداۋ ۇدەرىسىنە بەلسەندى تارتۋ. جوباعا ءوتىنىم قابىلداۋ 6 شىلدە مەن 2 تامىز ارالىعىندا ءوتتى. وسى كەزەڭدە jasalmaty.kz پورتالى ارقىلى الماتىلىق جاستاردان 203 جوبا كەلىپ ءتۇستى. تەكسەرۋ مەن ساراپتامالىق باعالاۋدان كەيىن ونىڭ 122ء-سى، ياعني جالپى باستامالاردىڭ 60،1%-ى ونلاين داۋىس بەرۋگە جىبەرىلدى. ونلاين داۋىس بەرۋ 11-18 تامىز ارالىعىندا ءوتتى. سەگىز كۇن ىشىندە قالا تۇرعىندارى ۇسىنىلعان جوبالارمەن تانىسىپ، وزدەرى ءۇشىن ماڭىزدى ءارى قاجەتتى باستامالارعا قولداۋ بىلدىرە الدى.
داۋىس بەرۋ قورىتىندىسى بويىنشا ءبىرىنشى ورىندى باقىتجامال شادييەۆانىڭ INCLUSION LAB – ينكليۋزيۆتى ءبىلىم بەرۋ تاجىريبەلەرى ورتالىعى جوباسى يەلەندى. ەكىنشى ورىنعا اسەت مادياردىڭ «انا اكادەمياسى» جوباسى جايعاستى. ءۇشىنشى ورىن مەرەكە ىڭىربايەۆتىڭ Jasyl Qala – العاشقى ءبىلىم بەرۋ سيتي-فەرماسى جانە دۇرىس تاماقتانۋ زەرتحاناسى جوباسىنا بەرىلدى.
ۇزدىك جوبالاردىڭ قاتارىندا سيفرلىق تەحنولوگيا مەن جاساندى ينتەللەكت ارقىلى وقۋ مادەنيەتىن دامىتۋعا باعىتتالعان KITAP HUB AI، بالالاردى دامىتۋ جانە وڭالتۋ ورتالىعى BabyCare، «يدەيا» جوباسى، ينجەنەرلىك-دامىتۋشى QUM TRACK حابى، SÄT APP ءموبيلدى قوسىمشاسى، سونداي-اق «كاسىپكەر» جانە «سەنىم» مەديا-جوبالارى بار.
وسىلايشا، تۇرعىنداردان ەڭ كوپ قولداۋ العان باستامالار اراسىندا ينكليۋزيۆتى ءبىلىم بەرۋ مەن وتباسىلاردى قولداۋدان باستاپ، عىلىم، قارجىلىق ساۋاتتىلىق، قۇقىقتىق مادەنيەت جانە جاستار كاسىپكەرلىگىن دامىتۋعا دەيىنگى ءارتۇرلى باعىتتاعى جوبالار قامتىلدى.
«بۇل جوبانىڭ باستى ەرەكشەلىگى، جاستار قالالىق باعدارلامالاردىڭ جاي عانا الۋشىسى ەمەس، الماتى ءۇشىن ناقتى شەشىمدەردىڭ اۆتورى رەتىندە تانىلادى. ولار ماسەلەنى وزدەرى انىقتاپ، ونى شەشۋدىڭ جولىن ۇسىنادى، جوباسىن ازىرلەيدى جانە قالا قولداۋىمەن ونى جۇزەگە اسىرۋ مۇمكىندىگىنە يە بولادى»، – دەدى جوبا جەتەكشىسى سامارحان ابدۋعالييەۆ.
ءبىر جوبانى جۇزەگە اسىرۋعا 500 مىڭنان 5 ملن تەڭگەگە دەيىن قارجى باعىتتالۋى مۇمكىن. بيىل 18-20 جاستار جوباسىن ىسكە اسىرۋ جوسپارلانعان. ال الداعى ۋاقىتتا قولداۋ كورسەتىلەتىن باستامالار سانىن جىل سايىن 50 جوباعا دەيىن ارتتىرۋ كوزدەلىپ وتىر.
«جاستار قاتىساتىن بيۋدجەت» جاستارعا يدەياسىن ناقتى جوباعا اينالدىرىپ، ونى جۇزەگە اسىرۋعا مۇمكىندىك بەرەتىن جانە الماتىنىڭ دامۋىنا تىكەلەي ۇلەس قوسۋعا جول اشاتىن ءتيىمدى تەتىككە اينالىپ كەلەدى.
