2026 جىلدىڭ العاشقى التى ايىندا الماتىدا 274 دەمالىس كۇنگى اۋىل شارۋاشىلىعى جارمەڭكەسى ۇيىمداستىرىلىپ، وعان 500 مىڭنان استام قالا تۇرعىنى مەن قوناعى كەلدى، - دەپ حابارلايدى alnews.
وسى كەزەڭدە شامامەن 13 مىڭ توننا اۋىل شارۋاشىلىعى ءونىمى، ونىڭ ىشىندە الەۋمەتتىك ماڭىزى بار ازىق-تۇلىك تاۋارلارى ساتىلدى.
«الماتى» الەۋمەتتىك-كاسىپكەرلىك كورپوراسياسى ۇيىمداستىراتىن جارمەڭكەلەر وتاندىق اۋىل شارۋاشىلىعى تاۋارىن وندىرۋشىلەرگە ونىمدەرىن دەلدالسىز، تىكەلەي جانە قولجەتىمدى باعامەن ساتۋعا مۇمكىندىك بەرەدى. ساتىپ الۋشىلارعا كوكونىس، جەمىس-جيدەك، ەت جانە ءسۇت ونىمدەرى، جۇمىرتقا، بال، نان-توقاش جانە كونديتەرلىك ونىمدەر، كەپتىرىلگەن جەمىستەر مەن باسقا دا تاۋارلاردىڭ مىڭنان استام ءتۇرى ۇسىنىلادى.
جارمەڭكەلەرگە الماتى قالاسى، الماتى وبلىسى جانە ەلىمىزدىڭ وزگە وڭىرلەرىنەن 300-دەن استام فەرمەرلىك شارۋاشىلىق، اۋىل شارۋاشىلىعى تاۋارىن وندىرۋشىلەر مەن كاسىپكەرلەر تۇراقتى تۇردە قاتىسادى. بۇل فورمات وتاندىق وندىرۋشىلەردى قولداۋعا جانە ازىق-تۇلىك باعاسىنىڭ قولجەتىمدى دەڭگەيدە ساقتالۋىنا ىقپال ەتەدى.
قازىرگى ۋاقىتتا دەمالىس كۇنگى جارمەڭكەلەر قالانىڭ بەس اۋدانىندا – اۋەزوۆ، المالى، مەدەۋ، بوستاندىق جانە جەتىسۋ اۋداندارىندا وتكىزىلەدى.
سونىمەن قاتار «الماتى» اكك ساۋدا الاڭدارىن جاڭعىرتۋ جۇمىستارىن جالعاستىرىپ جاتىر. قازىرگى كەزدە بوستاندىق اۋدانىنداعى «قازاقفيلم» شاعىناۋدانىندا جانە اۋەزوۆ اۋدانىندا جوندەۋ جۇمىستارى جۇرگىزىلۋدە. وسىعان بايلانىستى اۋەزوۆ اۋدانىنداعى جارمەڭكە ۋاقىتشا رىسقۇلبەكوۆ كوشەسى، 33/2 مەكەنجايىنا كوشىرىلدى.
جاڭعىرتۋ جۇمىستارى اياسىندا اۋماقتى كوركەيتۋ، ساۋدا پاۆيلوندارىن جاڭارتۋ، سانيتارلىق ينفراقۇرىلىمدى جاقسارتۋ، ينجەنەرلىك جەلىلەردى جۇرگىزۋ جانە نىسانداردى قولدانىستاعى زاڭناما تالاپتارى مەن الماتى قالاسىنىڭ ديزاين-كودىنا سايكەستەندىرۋ كوزدەلگەن.
الداعى ۋاقىتتا جارمەڭكە الاڭدارىن جاڭعىرتۋ جۇمىستارى كەزەڭ-كەزەڭىمەن قالانىڭ بارلىق سەگىز اۋدانىندا قولعا الىنادى.
دەمالىس كۇنگى جارمەڭكەلەر ءار سەنبى جانە جەكسەنبى كۇندەرى ساعات 09:00-دەن 18:00-گە دەيىن جۇمىس ىستەيدى.
جارمەڭكەلەردىڭ مەكەنجايلارى:
* بوستاندىق اۋدانى – «قازاقفيلم» شاعىناۋدانى؛
* اۋەزوۆ اۋدانى – رىسقۇلبەكوۆ كوشەسى، 33/2؛
* مەدەۋ اۋدانى – مەڭدىقۇلوۆ پەن بەكتۇروۆ كوشەلەرىنىڭ قيىلىسى؛
* المالى اۋدانى – ماسانچي كوشەسى (ايتەكە بي مەن گوگول كوشەلەرىنىڭ ارالىعى)؛
* جەتىسۋ اۋدانى – قۇلاگەر شاعىناۋدانى.
