جاڭا وقۋ جىلىنا وراي الماتىدا 8 جاڭا جالپى ءبىلىم بەرەتىن مەكتەپ پەن قولدانىستاعى مەكتەپتەردىڭ قوسىمشا كورپۋستارى اشىلدى، - دەپ حابارلايدى alnews.
جالپى سانى 12 065 جاڭا وقۋشى ورنى قۇرىلدى. بۇل تۋرالى قالالىق ءبىلىم باسقارماسىنىڭ وكىلدەرى ايتتى.
بيىل 32 922 بالا العاش رەت مەكتەپ تابالدىرىعىن اتتادى. ونىڭ 30 046-سى مەملەكەتتىك مەكتەپتەرگە، تاعى 2 876-سى جەكەمەنشىك مەكتەپتەرگە قابىلداندى.
ءقازىر الماتىدا 362 جالپى ءبىلىم بەرەتىن مەكتەپ جۇمىس ىستەيدى. وندا 356 مىڭعا جۋىق بالا ءبىلىم الادى. وتكەن وقۋ جىلىمەن سالىستىرعاندا وقۋشىلار سانى شامامەن 3%-عا ارتتى، ال مەملەكەتتىك مەكتەپتەر سانى 10-عا كوبەيدى.
جاڭا مەكتەپتەر قوسىمشا وقۋشى ورنىنا سۇرانىس جوعارى اۋدانداردا اشىلدى. الاتاۋ اۋدانىندا 3 750 ورىندىق ءۇش مەكتەپ، تۇركسىب اۋدانىندا 6 100 ورىندىق ءتورت مەكتەپ، جەتىسۋ اۋدانىندا 1 200 ورىندىق ءبىر مەكتەپ پايدالانۋعا بەرىلدى. №112 جانە №16 مەكتەپتەر جانىنان ءارقايسىسى 300 ورىندىق قوسىمشا كورپۋستار اشىلدى.
«كەلەشەك مەكتەپتەرى» جوباسى اياسىندا الماتىدا جالپى سىيىمدىلىعى 34 800 ورىن بولاتىن 21 مەكتەپ پايدالانۋعا بەرىلدى.
سونىمەن قاتار قولدانىستاعى ءبىلىم بەرۋ ينفراقۇرىلىمىن جاڭارتۋ جۇمىستارى جالعاسىپ جاتىر. №60، №160 جانە №124 مەكتەپتەردى قايتا جاڭعىرتۋ اياقتالدى. №15 مەكتەپ-ينتەرنات تا جوندەۋدەن كەيىن قايتا اشىلدى. 164 مەكتەپتە اعىمداعى جوندەۋ جۇرگىزىلدى. مەملەكەتتىك ءبىلىم بەرۋ ۇيىمدارىندا حيميا، فيزيكا، بيولوگيا، STEM جانە روبوتوتەحنيكا بويىنشا 1 130 زاماناۋي كابينەت جابدىقتالدى.
الەۋمەتتىك قولداۋ شارالارى دا جالعاسىپ جاتىر. «مەكتەپكە جول» اكسياسى اياسىندا الەۋمەتتىك وسال ساناتتاعى 7 669 بالاعا مەكتەپ فورماسى مەن وقۋ قۇرالدارىن ساتىپ الۋعا 60 مىڭ تەڭگەدەن بەرىلدى. 133 مىڭ بالا تەگىن ىستىق تاماقپەن قامتىلدى.
قالاداعى بارلىق مەكتەپ ينتەرنەت جەلىسىنە قوسىلعان. 235 مەكتەپتە تالشىقتى-وپتيكالىق بايلانىس جەلىلەرىنىڭ ارقاسىندا ينتەرنەت جىلدامدىعى 100 مبيت/س-قا جەتەدى.
قاۋىپسىزدىك پەن كولىك قولجەتىمدىلىگىنە دە ەرەكشە كوڭىل بولىنگەن. 202 مەملەكەتتىك بالاباقشا مەن 235 مەملەكەتتىك مەكتەپ كەشەندى قاۋىپسىزدىك جۇيەلەرىمەن تولىق جابدىقتالعان. «مەكتەپ اۆتوبۋسى» جوباسى اياسىندا 60 مەكتەپتىڭ 11 مىڭنان استام وقۋشىسى تاسىمالمەن قامتىلعان. بۇل ءۇشىن 250 اۆتوبۋس جۇمىلدىرىلدى.
