الماتىداعى قازاق مەملەكەتتىك سيركىندە IV حالىقارالىق سيرك ونەرى فەستيۆالىنىڭ سالتاناتتى اشىلۋ ءراسىمى ءوتتى، - دەپ حابارلايدى alnews.
بيىلعى فەستيۆال الەمنىڭ ءار تۇكپىرىنەن كەلگەن سيرك ارتيستەرىن، رەجيسسەرلەردى، پروديۋسەرلەر مەن سالا ساراپشىلارىن ءبىر الاڭعا جينادى. بۇل تۋرالى قالالىق مادەنيەت باسقارماسىنىڭ وكىلدەرى ايتتى.
فەستيۆال حالىقارالىق باسپا ءسوز كونفەرەنسياسىمەن باستالدى. وعان قازىلار القاسىنىڭ ءتوراعاسى، قازاق مەملەكەتتىك سيركىنىڭ ديرەكتورى ماقسات جايىقوۆ، قازىلار القاسىنىڭ مۇشەلەرى، رەسەي، تاجىكستان، شۆەيساريا جانە اقش-تىڭ سيرك ۇيىمدارىنىڭ جەتەكشىلەرى، سونداي-اق Cirque du Soleil كومپانياسىنىڭ كاستينگ جانە تالانتتاردى ىرىكتەۋ جونىندەگى ديرەكتورى يرينا ناۋمەنكو قاتىستى.
كەزدەسۋ بارىسىندا قاتىسۋشىلار زاماناۋي سيرك ونەرىنىڭ دامۋ ۇردىستەرىن، حالىقارالىق ارىپتەستىكتى نىعايتۋ جانە مادەني بايلانىستى كەڭەيتۋ ماسەلەلەرىن تالقىلادى.
اشىلۋ سالتاناتىنا ارنايى جاڭا ساحنالىق كوستيۋمدەر مەن كوركەم بەينەلەر ازىرلەندى. بيىل فەستيۆال مانەجىندە العاش رەت تۇركيا، فرانسيا جانە شۆەيساريانىڭ ارتيستەرى ونەر كورسەتەدى.
بايقاۋ باعدارلاماسى اياسىندا قاتىسۋشىلار گران-پري، سونداي-اق ءۇش التىن، ءۇش كۇمىس جانە ءۇش قولا جۇلدەنى ساراپقا سالادى. حالىقارالىق قازىلار القاسى ارتيستەردىڭ كاسىبي شەبەرلىگىن، قويىلىمداردىڭ ەرەكشەلىگى مەن ورىنداۋ دەڭگەيىن باعالايدى.
سالتاناتتى ءراسىم بارىسىندا العاش رەت وسى فەستيۆالگە ارنايى جازىلعان رەسمي ءانۇران شىرقالدى. رەسمي بولىمنەن كەيىن مانەجدە ءارتۇرلى ەلدەردىڭ ارتيستەرى قاتىسقان بايقاۋ باعدارلاماسى باستالدى.
1-23 تامىز ارالىعىندا قازاق مەملەكەتتىك سيركىندە فەستيۆالدىڭ جەڭىمپازدارى مەن جۇلدەگەرلەرىنىڭ قاتىسۋىمەن ارنايى سيرك باعدارلاماسى وتەدى.
