الماتى قالاسىندا 2026 جىلعا ارنالعان عىلىمي جانە عىلىمي-تەحنيكالىق جوبالارعا گرانتتىق قارجىلاندىرۋ بويىنشا ءوتىنىم قابىلداۋ اياقتالۋعا جاقىن، - دەپ حابارلايدى alnews.
بايقاۋ عىلىم كۇنى اياسىندا، قازاقستان رەسپۋبليكاسى پرەزيدەنتىنىڭ عىلىمنىڭ ءرولىن كۇشەيتۋ جانە زاماناۋي عىلىمي ەكوجۇيەنى قالىپتاستىرۋ جونىندەگى تاپسىرمالارى شەڭبەرىندە، سونداي-اق سيفرلاندىرۋ جىلىنىڭ باسىمدىقتارىنا سايكەس جاريالانعان.
بايقاۋ قالانىڭ ناقتى مىندەتتەرىن شەشۋگە باعىتتالعان قولدانبالى زەرتتەۋلەردى قولداۋعا ارنالعان. بۇل مىندەتتەر الماتى قالاسىنىڭ 2050 جىلعا دەيىنگى دامۋ ستراتەگياسىندا ايقىندالعان.
قارجىلاندىرۋدىڭ باسىم باعىتتارىنا قولايلى قالالىق ورتانى دامىتۋ، تۇراقتى ەكونوميكالىق ءوسىمدى قامتاماسىز ەتۋ، ۋربانيزاسيانى ءتيىمدى باسقارۋ، الەۋمەتتىك تۇراقتىلىق، «جاسىل الماتى» باستاماسى اياسىنداعى ەكولوگيالىق ساياسات، «الماتى – سمارت-سيتي» سيفرلىق ترانسفورماسياسى، سونداي-اق «ءقاۋىپسىز قالا» تۇجىرىمداماسى شەڭبەرىندە قاۋىپسىزدىك دەڭگەيىن ارتتىرۋ جاتادى.
بايقاۋدىڭ ەرەكشەلىگى — ونىڭ قولدانبالى سيپاتى جانە عىلىمي ازىرلەمەلەردى قالالىق ورتاعا ەنگىزۋگە باعىتتالۋى. بۇل ءتاسىل تەوريالىق زەرتتەۋلەردەن تىكەلەي قالا تۇرعىندارىنىڭ ءومىر ساپاسىنا اسەر ەتەتىن پراكتيكالىق شەشىمدەرگە كوشۋگە مۇمكىندىك بەرەدى.
«بايقاۋدىڭ ەرەكشەلىگى — عىلىم، مەملەكەت جانە بيزنەستىڭ جاڭا ءوزارا ءىس-قيمىل مودەلىن قالىپتاستىرۋىندا. عىلىمي ازىرلەمەلەر قالانىڭ ناقتى ماسەلەلەرىن شەشۋگە باعىتتالادى، ال گرانتتار ولاردىڭ ءىس جۇزىندە ەنگىزىلۋىنە ارنالعان»، — دەدى «تۇران» ۋنيۆەرسيتەتىنىڭ پرورەكتورى دينا رازاقوۆا.
عىلىمي قاۋىمداستىق وكىلدەرىنىڭ ايتۋىنشا، نەگىزگى مىندەت — پراكتيكالىق ىسكە اسىرۋعا دايىن جوبالاردى قولداۋ. ساراپشىلار قولدانبالى عىلىمدى دامىتۋ قالا ءومىر ساپاسىن ارتتىرۋ مەن تۇراقتى دامۋدىڭ ماڭىزدى فاكتورى ەكەنىن اتاپ وتەدى.
«اكىمدىك گرانتتارى عىلىمي ازىرلەمەلەردىڭ زەرتحانادان شىعىپ، ەكولوگيادا، كولىكتە، سيفرلىق قىزمەتتەردە جانە باسقا دا سالالاردا قولدانىلۋىنا باعىتتالعان»، — دەدى شولپان جامانبايەۆا.
وتىنىمدەر 2026 جىلعى 10 ءساۋىر مەن 10 مامىر ارالىعىندا الماتى قالاسى اكىمدىگىنىڭ كەڭسەسى ارقىلى قاعاز جانە ەلەكتروندىق فورماتتا قابىلدانادى. تولىق اقپارات اكىمدىكتىڭ رەسمي سايتىندا قولجەتىمدى.
بايقاۋدى ۇيىمداستىرۋشى — الماتى قالاسىنىڭ جاستار ساياساتى باسقارماسى. قاتىسۋعا اككرەديتتەلگەن عىلىمي جانە عىلىمي-تەحنيكالىق قىزمەت سۋبەكتىلەرى، سونداي-اق اۆتونومدى ءبىلىم بەرۋ ۇيىمدارى جىبەرىلەدى.
گرانتتىق قارجىلاندىرۋدىڭ ىسكە قوسىلۋى عىلىمدى دامىتۋ جانە يننوۆاسيالىق شەشىمدەردى قالالىق ورتاعا ەنگىزۋ جونىندەگى مەملەكەتتىك ساياساتتى جۇزەگە اسىرۋداعى ماڭىزدى قادام بولماق.
انىقتاما تەلەفوندارى: +7 (727) 338-50-02، +7 (727) 338-39-00، +7 (727) 338-38-39
ەسكە سالايىق، الماتى اكىمى تاپسىرماسىنا سايكەس قالادا عىلىمي الەۋەت پەن قولدانبالى زەرتتەۋلەردى جۇيەلى تۇردە قولداۋ قالىپتاسىپ كەلەدى. الماتى ءداستۇرلى تۇردە ەلىمىزدىڭ ەڭ ءىرى ءعىلىمي-بىلىم ورتالىعى مارتەبەسىن ساقتاپ وتىر.
قالادا 35 جوعارى وقۋ ورنى، 131 عىلىمي-زەرتتەۋ ينستيتۋتى جانە عىلىم سالاسىنداعى 142 كاسىپورىن جۇمىس ىستەيدى. بۇل الماتىنىڭ دامۋىنا زور زياتكەرلىك رەسۋرس قالىپتاستىرادى.
