ءال-فارابي داڭعىلىنىڭ Esentai Mall ساۋدا ويىن-ساۋىق ورتالىعى ماڭىنداعى بولىگىندە جول قوزعالىسىن ۇيىمداستىرۋ سىزباسى وزگەردى، - دەپ حابارلايدى alnews.
بۇل شارا كولىك قوزعالىسىن رەتتەپ، جول قاۋىپسىزدىگىن ارتتىرۋ جانە جۇرگىزۋشىلەردىڭ جولاقتاردى رەتسىز اۋىستىرۋىنا جول بەرمەۋ ماقساتىندا قولعا الىندى. بۇل تۋرالى قالالىق جول قوزعالىسىن ۇيىمداستىرۋ جانە جولاۋشىلار كولىگى باسقارماسىنىڭ وكىلدەرى حابارلادى.
باسقارمانىڭ مالىمەتىنشە، بۇعان دەيىن ساۋدا ورتالىعىنان شىققان جۇرگىزۋشىلەر بىردەن كورشىلەس جولاقتارعا اۋىسا الاتىن. سونىڭ سالدارىنان بىرنەشە كولىك قاتار مانيەۆر جاساپ، سول جاق شەتكى جولاققا ۇمتىلاتىن. بۇل جولداعى قوزعالىستىڭ باياۋلاۋىنا جانە كولىكتەردىڭ بىركەلكى جۇرمەۋىنە سەبەپ بولعان.
ەندى سولتۇستىك باعىتتا ۇشكەمپىروۆ كوشەسىنەن ەسەنتاي وزەنىنە دەيىنگى ارالىقتا قوزعالىس سىزباسى رەتتەلدى. ساۋدا ورتالىعىنان شىققان كولىكتەردىڭ بىردەن جولاق اۋىستىرۋىنا شەكتەۋ قويىلىپ، بۇل بولىكتە تۇتاس جولاق سىزىقتارى سىزىلدى.
جاڭا ءتارتىپ بىرنەشە كولىكتىڭ ءبىر ۋاقىتتا مانيەۆر جاساۋىن ازايتىپ، كولىك سانىن جولاقتارعا بىركەلكى بولۋگە جانە وسى ۋچاسكەدەگى قوزعالىستى جەڭىلدەتۋگە مۇمكىندىك بەرەدى.
جۇرگىزۋشىلەردەن قوزعالىس سىزباسىنداعى وزگەرىستەردى ەسكەرىپ، جول بەلگىلەرى مەن جول تاڭبالارىنىڭ تالاپتارىن ساقتاۋدى جانە قازاقستان رەسپۋبليكاسىنىڭ جول قوزعالىسى ەرەجەلەرىن باسشىلىققا الۋدى سۇرايمىز.
