الماتىداعى №5 قالالىق كلينيكالىق اۋرۋحانادا مامانداندىرىلعان ستوماتولوگيا بولىمشەسى اشىلدى، - دەپ حابارلايدى alnews.
ونىڭ نەگىزگى جۇمىس باعىتتارىنىڭ ءبىرى ەرەكشە قاجەتتىلىگى بار بالالاردىڭ ءتىسىن جالپى انەستەزيا ارقىلى ەمدەۋ. بۇل تۋرالى قالالىق قوعامدىق دەنساۋلىق ساقتاۋ باسقارماسىنىڭ وكىلدەرى حابارلادى.
دامۋ ەرەكشەلىگى بار نەمەسە ءتىس دارىگەرىنەن قاتتى قورقاتىن بالالار ءۇشىن ستوماتولوگيالىق ەم قابىلداۋ وڭايعا سوقپايدى. كەيبىر جاعدايدا ولاردىڭ مەديسينالىق پروسەدۋرالارعا ءتوزۋى قيىن بولۋى مۇمكىن. وسىنداي پاسيەنتتەرگە قاجەتتى ەمدى جالپى انەستەزيا ارقىلى، دارىگەرلەردىڭ تۇراقتى باقىلاۋىمەن جۇرگىزۋ قاراستىرىلعان.
بولىمشە قاجەتتى مەديسينالىق قۇرال-جابدىقتارمەن تولىق جابدىقتالعان. مۇندا ەرەسەكتەر مەن بالالاردى قابىلداۋعا ارنالعان كابينەتتەر، انەستەزيولوگتىڭ جۇمىس ورنى جانە انەستەزيادان كەيىن ناۋقاستىڭ ويانۋىنا ارنالعان پالاتا بار. ەمشارا الدىندا پاسيەنتتەر مەديسينالىق تەكسەرۋدەن وتەدى. ال انەستەزيانى قولدانۋ مۇمكىندىگى ءار ناۋقاستىڭ دەنساۋلىق جاعدايى مەن مەديسينالىق كورسەتىلىمدەرىنە قاراي جەكە انىقتالادى.
بولىمشەدە ءتىس ەمدەۋمەن قاتار اۋىز قۋىسىن كەشەندى ساۋىقتىرۋ جۇمىستارى جۇرگىزىلەدى. قاجەت بولعان جاعدايدا بىرنەشە ستوماتولوگيالىق پروسەدۋرانى ءبىر سەانستا ورىنداۋعا بولادى. بۇل پاسيەنتتەردىڭ اۋرۋحاناعا قايتا-قايتا كەلۋىن ازايتىپ، ەمدەۋ ۇدەرىسىن جەڭىلدەتۋگە مۇمكىندىك بەرەدى.
بولىمشە اشىلعاننان بەرى 100-دەن استام پاسيەنت جالپى انەستەزيامەن ستوماتولوگيالىق ەم العان. بۇدان بولەك، مەديسينالىق مەكەمەدە كۇن سايىن جوسپارلى جانە شۇعىل كومەك كورسەتىلەدى. ماماندار تاۋلىگىنە ورتا ەسەپپەن ءتىسىنىڭ قاتتى اۋىرسىنۋىنا شاعىمدانعان 10-عا جۋىق ادامدى قابىلدايدى.
جاڭا بولىمشە الماتىدا مامانداندىرىلعان ستوماتولوگيالىق كومەكتىڭ قولجەتىمدىلىگىن ارتتىرۋعا مۇمكىندىك بەرەدى. باسقارما وكىلدەرىنىڭ ايتۋىنشا، مەديسينا قىزمەتكەرلەرىنىڭ باستى ماقساتى – ءاربىر ناۋقاستىڭ جەكە قاجەتتىلىگىن ەسكەرە وتىرىپ، قولجەتىمدى ءارى مەديسينالىق قىزمەت كورسەتۋ.
