5 قىركۇيەكتە ورتالىق ستاديوندا وتەتىن ەنريكە يگلەسياستىڭ كونسەرتى كەزىندە الماتىداعى قوعامدىق كولىك، ونىڭ ىشىندە مەتروپوليتەن دە قالىپتى رەجيمدە جۇمىس ىستەيدى، - دەپ حابارلايدى alnews.
كورەرمەندەرگە ىڭعايلى بولۋ ءۇشىن ءارى قاۋىپسىزدىكتى قامتاماسىز ەتۋ ماقساتىندا كونسەرت اياقتالعاننان كەيىن 50 تەگىن شاتتل ۇيىمداستىرىلادى. ولار ستاديوننىڭ اباي داڭعىلى مەن بايتۇرسىن ۇلى كوشەسى جاعىنان جولعا شىعادى.
شاتتلدار كەلەسى باعىتتار بويىنشا قاتىنايدى:
* اۋەجاي؛
* وربيتا شاعىناۋدانى؛
* الماتى-1 تەمىرجول ۆوكزالى؛
* رايىمبەك-الاتاۋ؛
* الماتى ارەنا.
قوسىمشا باعىتتاردىڭ ۇيىمداستىرىلۋى كورەرمەندەرگە ءىس-شارا اياقتالعاننان كەيىن قالانىڭ نەگىزگى كولىك توراپتارى مەن اۋداندارىنا جىلدام جەتۋگە مۇمكىندىك بەرەدى.
الماتى تۇرعىندارى مەن قالا قوناقتارىنا ورتالىق ستاديونعا بارۋ جانە كەرى قايتۋ باعىتىن الدىن الا جوسپارلاپ، مۇمكىندىگىنشە قوعامدىق كولىكتى پايدالانۋ ۇسىنىلادى.
ەسكە سالايىق، ەنريكە يگلەسياستىڭ الماتىداعى كونسەرتى 5 قىركۇيەكتە ورتالىق ستاديوندا وتەدى. ءىس-شارا ساعات 20:00-دە باستالادى.
