الماتى اكىمىنىڭ ورىنباسارى ابزال نۇكەنوۆ ۇلىبريتانيا قاۋىمدار پالاتاسى قورعانىس كوميتەتىنىڭ ءتوراعاسى تان دەسي باستاعان ۇلىبريتانيا پارلامەنتى دەلەگاسياسىمەن كەزدەستى، - دەپ حابارلايدى alnews.
كەزدەسۋگە ۇلىبريتانيانىڭ قازاقستانداعى ەلشىسى ساللي اكسۋورسي دە قاتىستى.
كەزدەسۋدىڭ نەگىزگى تاقىرىپتارىنىڭ ءبىرى بريتاندىق بيزنەستى قالالىق جوبالارعا تارتۋ بولدى. بۇگىندە الماتىدا بريتاندىق كاپيتالى بار 256 كاسىپورىن تىركەلگەن. ولار كاسىبي جانە عىلىمي-تەحنيكالىق قىزمەت، ساۋدا، قارجى جانە باسقا دا سالالاردا جۇمىس ىستەيدى.
«الماتى پوليورتالىقتىق دامۋ مودەلى اياسىندا جاڭا ءوسۋ نۇكتەلەرىن قالىپتاستىرىپ كەلەدى. ءبىز بريتاندىق بيزنەسپەن قالالىق ينفراقۇرىلىم، كولىك، ديەۆەلوپمەنت، قوناق ءۇي بيزنەسى، جاسىل ەكونوميكا جانە زاماناۋي تەحنولوگيا سالالارىندا ىنتىماقتاستىق ورناتۋعا مۇمكىندىك بار دەپ سانايمىز»، – دەدى ابزال نۇكەنوۆ.
تاراپتار تۋريستىك بايلانىستى دامىتۋ ماسەلەسىن دە تالقىلادى. 2026 جىلدىڭ ءبىرىنشى جارتىجىلدىعىندا الماتىعا ۇلىبريتانيادان 7 مىڭنان استام تۋريست كەلدى. بۇل وتكەن جىلدىڭ وسى كەزەڭىمەن سالىستىرعاندا 16،5%-عا كوپ. مۇمكىندىگى جوعارى باعىتتاردىڭ قاتارىندا تاۋ ءتۋريزمى، ءتيىستى ينفراقۇرىلىمدى دامىتۋ جانە تاجىريبە الماسۋ بار.
كەلىسسوزدەردىڭ جەكە بولىگى ءبىلىم بەرۋ جانە يننوۆاسيا سالاسىنا ارنالدى. الماتىدا بۇگىندە Coventry University كامپۋسى جۇمىس ىستەيدى. وندا ينجەنەرلىك جانە كومپيۋتەرلىك عىلىمدار، جاساندى ينتەللەكت جانە ساۋلەت باعىتتارى بويىنشا ءبىلىم بەرۋ باعدارلامالارى ۇسىنىلعان.
Queen’s University Belfast، SOAS University of London، University of London، De Montfort University جانە باسقا دا بريتاندىق جوعارى وقۋ ورىندارىمەن بىرلەسكەن اكادەميالىق جوبالار جۇزەگە اسىرىلىپ جاتىر.
كەزدەسۋ سوڭىندا تاراپتار الماتى مەن ۇلىبريتانيانىڭ ىسكەرلىك جانە اكادەميالىق ورتاسى اراسىنداعى تىكەلەي بايلانىستى جالعاستىرۋعا ۋاعدالاستى.
