الماتىدا قالالىق پەريناتالدىق ورتالىقتىڭ بازاسىندا ءقاۋىپ توبىنداعى جۇكتى ايەلدەرگە ارنالعان كلينيكالىق-دياگنوستيكالىق ورتالىق جۇمىسىن باستادى، - دەپ حابارلايدى alnews.
مۇندا جۇكتىلىگى اسقىنعان، قوسىمشا اۋرۋلارى بار جانە اكۋشەرلىك اسقىنۋلار ءقاۋپى جوعارى ايەلدەر امبۋلاتوريالىق جاعدايدا قاجەتتى تەكسەرۋەن ءوتىپ، مامانداردىڭ كەڭەسىن الا الادى. بۇل تۋرالى الماتى قالاسى قوعامدىق دەنساۋلىق ساقتاۋ باسقارماسىنىڭ وكىلدەرى حابارلادى.
كلينيكالىق-دياگنوستيكالىق ورتالىققا جۇكتى ايەل تىركەلگەن ەمحاناسىنىڭ جولداماسىمەن كەلەدى. مەديسينالىق كومەك ءمامس اياسىندا تەگىن كورسەتىلەدى.
جاڭا ورتالىقتىڭ اشىلۋىنا الماتى قالاسى قوعامدىق دەنساۋلىق ساقتاۋ باسقارماسىنىڭ باسشىسى مارات پاشيموۆ قاتىستى.
«جاڭا ورتالىق ءقاۋىپ توبىنداعى جۇكتى ايەلدەرگە مامانداندىرىلعان كومەكتى امبۋلاتوريالىق كەزەڭنەن باستاپ قولجەتىمدى ەتۋگە مۇمكىندىك بەرەدى. ىقتيمال اسقىنۋلاردى دەر كەزىندە انىقتاپ، انا مەن بالانىڭ جاعدايىن تۇراقتى باقىلاۋ جانە قاجەت بولعان جاعدايدا جەدەل شەشىم قابىلداۋ ماڭىزدى. بۇل جۇكتى ايەلدەرگە كورسەتىلەتىن مەديسينالىق كومەكتىڭ ساپاسى مەن قاۋىپسىزدىگىن ارتتىرۋ جولىنداعى تاعى ءبىر قادام»، – دەدى مارات پاشيموۆ.
قالالىق پەريناتالدىق ورتالىق – الماتىداعى ءۇشىنشى دەڭگەيلى اكۋشەرلىك كومەك كورسەتەتىن ءىرى مەديسينالىق ۇيىمداردىڭ ءبىرى. مۇندا جىل سايىن 9-10 مىڭعا جۋىق ايەل بوسانادى. ورتالىق ماماندارى جۇكتىلىگى اسقىنعان ايەلدەرگە مەديسينالىق كومەك كورسەتىپ، دەنە سالماعى وتە تومەن بولىپ تۋعان نارەستەلەرگە كۇتىم جاسايدى.
جاڭا ورتالىق زاماناۋي مەديسينالىق جابدىقتارمەن قامتىلعان. مۇندا مرت، ساراپتامالىق دەڭگەيدەگى ۋدز، كولپوسكوپيا جانە كتگ اپپاراتتارى بار. سونىمەن قاتار زەرتحانالىق قىزمەت كورسەتىلەدى. الماتى قالاسى اكىمدىگى مەن قوعامدىق دەنساۋلىق ساقتاۋ باسقارماسىنىڭ قولداۋىمەن بيىل كومپيۋتەرلىك توموگراف ورناتۋ جوسپارلانىپ وتىر.
جۇكتى ايەلدەردى اكۋشەر-گينەكولوگتارمەن قاتار گەنەتيك، تەراپيەۆت، وفتالمولوگ جانە نيەۆرولوگ قابىلدايدى. وسىلايشا بولاشاق انالار بىرنەشە ماماننىڭ كەڭەسىن الىپ، قاجەتتى تەكسەرۋلەردەن ءبىر جەردە وتە الادى.
ورتالىقتىڭ جۇمىسى ءقاۋىپ توبىنداعى جۇكتى ايەلدەردى باقىلاۋدى كۇشەيتىپ، ىقتيمال اسقىنۋلاردى ەرتە انىقتاۋعا جانە قاجەتتى مەديسينالىق كومەكتى امبۋلاتوريالىق كەزەڭدە دەر كەزىندە كورسەتۋگە مۇمكىندىك بەرەدى.
بۇل الماتىدا ءقاۋىپ توبىنداعى جۇكتى ايەلدەرگە ارنالعان ەكىنشى كلينيكالىق-دياگنوستيكالىق ورتالىق. العاشقىسى بۇعان دەيىن پەريناتولوگيا جانە بالالار كارديوحيرۋرگياسى ورتالىعىنىڭ بازاسىندا اشىلعان.
