الماتىدا 10 قاراشا كەشىنەن بەرى تولاسسىز جاڭبىر جاۋىپ تۇر. «قازگيدرومەت» رمك مالىمەتىنشە، 11 قاراشا ساعات 10:00-دەگى جاعداي بويىنشا قالادا 23 مم، مەدەۋ اۋدانىندا 26 مم، كامەنسك ۇستىرتىندە 36 مم جاۋىن-شاشىن تۇسكەن، - دەپ حابارلايدى alnews.
كوممۋنالدىق قىزمەت كۇشەيتىلگەن رەجيمدە جۇمىس ىستەپ، كوشەلەر مەن اۋلالاردا سۋ جينالعان جەرلەردى تازالاپ جاتىر.
الماتى قالاسى كوممۋنالدىق ينفراقۇرىلىم جانە تۇرعىن ءۇي ينسپەكسياسى باسقارماسى وكىلدەرىنىڭ مالىمەتىنشە، تۇندە قالانىڭ بىرنەشە اۋدانىندا سۋ جينالعانى انىقتالعان.
قولايسىز اۋا رايىنىڭ سالدارىن بولدىرماۋ جانە جويۋ ءۇشىن جالپى سانى 1 579 ادامنان قۇرالعان 85 جەدەل بريگادا كەزەكشىلىككە شىقتى. جۇمىسقا 415 تەحنيكا مەن 97 موتوپومپا جۇمىلدىرىلىپ، 2 950 قۇم سالىنعان قاپ دايىندالدى. تاۋلىك بويعى جۇمىسقا 3 253 جول سالاسى جۇمىسشىسى تارتىلدى.
سينوپتيكتەردىڭ بولجامىنشا، 11 قاراشادا جاڭبىر كۇنى بويى وقتىن-وقتىن جاۋادى.
تاعى 10 مم-گە دەيىن جاۋىن-شاشىن ءتۇسۋى مۇمكىن. جەلدىڭ ەكپىنى 15-20 م/س-قا جەتەدى. كۇندىز اۋا تەمپەراتۋراسى +5…+7 °C شاماسىندا بولادى.
12 قاراشادا جاۋىن-شاشىنسىز اۋا رايى بولجانىپ وتىر، تۇمان ءتۇسۋى مۇمكىن.
قالا تۇرعىندارىنا قولايسىز اۋا رايىندا جولدا اباي بولىپ، كولىك جىلدامدىعىن ازايتۋ ۇسىنىلادى. سونداي-اق كولىكتەردى سۋ جينالۋى مۇمكىن اۋماقتارعا قويماۋ كەرەك. قاتتى جەل كەزىندە اعاشتاردىڭ تۇبىندە جانە جارناما قۇرىلىمدارىنىڭ ماڭىندا جۇرمەگەن ءجون.
