الماتىدا 10 قازاندا «تازا قازاقستان» رەسپۋبليكالىق ەكولوگيالىق باعدارلاماسى اياسىندا جالپىقالالىق سەنبىلىك ءوتتى، - دەپ حابارلايدى alnews.
قالا اۋماقتارىن تازالاۋ جانە كوگالداندىرۋ جۇمىستارىنا 3 480 ادام قاتىستى. بۇل تۋرالى قالانىڭ كوممۋنالدىق ينفراقۇرىلىم جانە تۇرعىن ءۇي ينسپەكسياسى باسقارماسىنىڭ وكىلدەرى ايتتى.
ەكولوگيالىق اكسيا قالانىڭ بارلىق سەگىز اۋدانىن قامتىدى. جۇمىس سكۆەرلەردى، كوشەلەردى، جاسىل ايماقتار مەن جاعالاۋ اۋماعىن قوسا العاندا، 10 ۋچاسكەدە جۇرگىزىلدى.
سەنبىلىككە قاتىسۋشىلار باۋم توعايىن، «بيوكومبينات» جانە راتۋشنىي سكۆەرلەرىن، سايالى مەن كوكشوقى شاعىناۋداندارىنىڭ اۋماقتارىن، سونداي-اق قارعالى وزەنىنىڭ بويىنداعى جانە ءبىرقاتار قالا كوشەلەرىندەگى ۋچاسكەلەردى رەتكە كەلتىردى.
ءىس-شارا قورىتىندىسى بويىنشا 506 تەكشە مەتر قوقىس پەن قالدىق جينالىپ، شىعارىلدى. تازالاۋ جۇمىستارىنا 79 ارنايى تەحنيكا جۇمىلدىرىلدى.
قالا اۋماقتارىن كوگالداندىرۋعا ەرەكشە نازار اۋدارىلدى. سەنبىلىك بارىسىندا 1 220 اعاش ەگىلدى. ونىڭ ىشىندە بيىكتىگى التى مەتردەن اساتىن ءىرى جوكە مەن ۇيەڭكى اعاشتارى، سونداي-اق ءساناعاش، شاعان جانە شىرشا كوشەتتەرى بار. اعاش ەگۋ جۇمىستارى الاتاۋ، اۋەزوۆ جانە ناۋرىزباي اۋداندارىندا جۇرگىزىلدى.
«تازا قازاقستان» باعدارلاماسى اياسىنداعى جالپىقالالىق سەنبىلىك قالانىڭ تازالىعىن ساقتاۋعا، قوعامدىق كەڭىستىكتەردى كوركەيتۋگە جانە الماتى تۇرعىندارىنىڭ ەكولوگيالىق مادەنيەتىن قالىپتاستىرۋعا باعىتتالعان.
