الماتىدا كوممۋنالدىق اقىلى اۆتوتۇراقتاردىڭ تاريفتەرىن كولىك جۇكتەمەسىنە قاراي سارالاۋ ۇسىنىلدى، - دەپ حابارلايدى alnews.
جاڭا ءتاسىل اۆتوتۇراق ورىندارىنىڭ قولجەتىمدىلىگىن ارتتىرىپ، كولىك قوزعالىسى قارقىندى ۋچاسكەلەردەگى جۇكتەمەنى ازايتۋعا باعىتتالعان. جوبا قالالىق ءماسليحات سەسسياسىندا تانىستىرىلدى.
كوممۋنالدىق اقىلى اۆتوتۇراقتارداعى قولدانىستاعى ساعاتىنا 100 تەڭگە تاريف 2016 جىلدان بەرى وزگەرگەن جوق. وسى ۋاقىت ىشىندە قالاداعى كولىك سانى 1 ميلليوننان اسىپ، جول-كولىك ينفراقۇرىلىمىنا تۇسەتىن جۇكتەمە ارتتى.
الماتى قالاسى جول قوزعالىسى جانە جولاۋشىلار كولىگىن ۇيىمداستىرۋ باسقارماسىنىڭ باسشىسى ەرجان ديحانبايەۆتىڭ ايتۋىنشا، ءبىرىڭعاي تاريف، اسىرەسە قالانىڭ ورتالىق بولىگىندە، اۆتوتۇراق ورىندارىنىڭ ءتيىمدى اينالىمىن قامتاماسىز ەتىپ، بوس ورىنداردىڭ قولجەتىمدىلىگىن ساقتاۋعا جەتكىلىكسىز بولىپ وتىر. سونىڭ سالدارىنان جۇرگىزۋشىلەر بوس ورىن ىزدەپ، كولىكپەن قوسىمشا جۇرۋگە ءماجبۇر بولادى.
وسى ماسەلەنى شەشۋ ءۇشىن اۆتوتۇراق ءتاريفىن اۋماقتاعى كولىك جۇكتەمەسى مەن ونىڭ فۋنكسيونالدىق ەرەكشەلىگىنە قاراي بەلگىلەۋ ۇسىنىلادى.
جوبا بويىنشا كولىك جۇكتەمەسى تومەن ۋچاسكەلەردە ساعاتىنا 100 تەڭگە تاريف ساقتالادى. ورتاشا جۇكتەمەلى اۋماقتاردا تاريف 150 تەڭگە، ال كولىك كوپ جۇرەتىن ءارى اۆتوتۇراق ورىندارى تاپشى ۋچاسكەلەردە 200 تەڭگە بولادى.
بۇل رەتتە تۇرعىندارعا ارنالعان جەڭىلدىك ساقتالادى. اقىلى اۆتوتۇراق ايماعىندا تۇراتىن تۇرعىن ءۇي يەلەرى ارنايى رۇقسات راسىمدەپ، ۇيىنە جاقىن ورنالاسقان اۆتوتۇراقتى تەگىن پايدالانا الادى. سونىمەن قاتار پايدالانۋشىلاردىڭ كەيبىر ساناتتارى ءۇشىن قولدانىستاعى جەڭىلدىكتەر دە ساقتالادى. بۇل شارا جەرگىلىكتى تۇرعىنداردىڭ مۇددەسىن ەسكەرۋگە جانە اۆتوتۇراق كەڭىستىگىن جايلى پايدالانۋعا مۇمكىندىك بەرەدى.
جوبا ازىرلەۋشىلەرىنىڭ پىكىرىنشە، ۇسىنىلىپ وتىرعان وزگەرىس اۆتوتۇراق كەڭىستىگىن نەعۇرلىم ءتيىمدى باسقارۋعا باعىتتالعان.
جاڭا جۇيە اۆتوتۇراق ورىندارىنىڭ اينالىمىن ارتتىرىپ، كولىك كوپ جينالاتىن كوشەلەردە تۇراقتاۋ ۋاقىتىن قىسقارتۋعا جانە قىسقا مەرزىمگە كولىك قوياتىن جۇرگىزۋشىلەر ءۇشىن بوس ورىنداردىڭ قولجەتىمدىلىگىن جاقسارتۋعا باعىتتالعان.
جوبانى ىسكە اسىرۋ ەكىنشى قاتارعا كولىك قويۋ جاعدايىن ازايتۋعا، بوس ورىن ىزدەۋگە كەتەتىن ۋاقىتتى قىسقارتۋعا، قالا ورتالىعىنداعى كولىك جۇكتەمەسىن تومەندەتۋگە جانە جول قوزعالىسىنا قاتىسۋشىلاردىڭ بارلىعى ءۇشىن نەعۇرلىم قولايلى جاعداي جاساۋعا كومەكتەسەدى دەپ بولجانىپ وتىر.
