الماتىدا 22 قازاندا اتى اڭىزعا اينالعان قازاقستاندىق «دوس-مۇقاسان» توبىنا ارنالعان ارت-ينستاللياسيا سالتاناتتى تۇردە اشىلادى، - دەپ حابارلايدى alnews.
جاڭا ارت-نىسان اباي داڭعىلى مەن ساتبايەۆ كوشەسىنىڭ اراسىنداعى جاڭارتىلعان ماسانچي كوشەسىندە ورناتىلدى. بۇل تۋرالى قالالىق قوعامدىق كەڭىستىكتەردى دامىتۋ باسقارماسىنىڭ وكىلدەرى حابارلادى.
ينستاللياسيا ايگىلى مۋزىكالىق ۇجىم مۇشەلەرىنىڭ جيىنتىق كوركەم بەينەسىن سيپاتتايدى. كومپوزيسيا مەتالدان اۆتورلىق ەرەكشە تەحنيكامەن جاسالعان. قۇرىلىمنىڭ بيىكتىگى – 1،8 مەتر، ەنى – 3،5 مەتر.
ارت-نىساننىڭ باستى ەرەكشەلىگى – ينتەراكتيۆتى اۋديوجۇيە. ارنايى باتىرمانى باسۋ ارقىلى كەز كەلگەن ادام «دوس-مۇقاسان» توبىنىڭ تانىمال اندەرىن تىڭداي الادى. وسىلايشا، ينستاللياسيا قالا كەڭىستىگىن كوركەمدەيتىن نىسان عانا ەمەس، اشىق اسپان استىنداعى وزىندىك مۋزىكالىق الاڭعا اينالادى.
ينستاللياسيا ورناتىلاتىن ورىن مۋزىكالىق ۇجىمنىڭ الماتىمەن تىعىز بايلانىستى تاريحى ەسكەرىلە وتىرىپ تاڭدالعان. 1967 جىلى قازاق پوليتەحنيكالىق ينستيتۋتىنىڭ ستۋدەنتتەرى دوسىم سۇلەيەۆ، مۇرات قۇسايىنوۆ، قاميت سانبايەۆ جانە الەكساندر ليتۆينوۆ ۆوكالدى-اسپاپتىق انسامبل قۇردى. كەيىن بۇل ۇجىم قازاقستانداعى ەڭ تانىمال مۋزىكالىق توپتاردىڭ بىرىنە اينالدى.
ينستاللياسيانى ورناتۋ ماسانچي كوشەسىن كوركەيتۋ تۇجىرىمداماسى اياسىندا قاراستىرىلعان. مۇندا قالا مادەنيەتى مەن شىعارماشىلىعىنا باسىمدىق بەرىلگەن گاسترونوميالىق كەڭىستىك قالىپتاسىپ جاتىر. جاڭا ارت-نىسان جاڭارتىلعان كوشەنىڭ كورىكتى ورىندارىنىڭ بىرىنە اينالىپ، وتاندىق مۋزىكا تاريحى مەن ونىڭ الماتىمەن بايلانىسىن ەسكە سالادى.
ارت-ينستاللياسيانىڭ اشىلۋ ءراسىمى 22 قازاندا ساعات 14:00-دە وتەدى. ءىس-شارا بارىسىندا قۇرمەتتى قوناقتار ءسوز سويلەپ، ارت-نىسان رەسمي تۇردە اشىلادى، مۋزىكالىق باعدارلاما دا جوسپارلانعان. «دوس-مۇقاسان» توبىنىڭ تانىمال اندەرىن Satbayev University ستۋدەنتتىك فيلارمونياسىنىڭ Meir BAND ءانسامبلى ورىندايدى.
