الماتى قالاسى مادەنيەت باسقارماسى قالامىزدىڭ ءومىرىن زاماناۋي شىعارماشىلىق فورماتتا تانىتاتىن تالانتتى اۆتورلاردى انىقتاۋ جانە قولداۋ ماقساتىندا «اسپان تاۋلى الماتى!» رەسپۋبليكالىق بەينەكونتەنت بايقاۋىن جاريالايدى، - دەپ حابارلايدى alnews.
بايقاۋ الماتىنىڭ وزىندىك تاريحىن، بولمىسىن، بۇگىنگى تىنىسىن، مادەنيەتىن، ساۋلەتىن جانە تابيعاتىن بەينەكونتەنت ارقىلى كورسەتۋگە جانە دارىپتەۋگە باعىتتالعان. بايقاۋعا قاتىسۋشىلار اسەم قالانىڭ كوپشىلىككە تانىس قىرلارىمەن قاتار، كۇندەلىكتى ومىردەن بايقالا بەرمەيتىن ەرەكشەلىكتەرىن دە ءوز شىعارماشىلىق كوزقاراسى ارقىلى ۇسىنىپ، دودا جەڭىمپازىنا اينالۋ مۇمكىندىگىنە يە بولادى.
بايقاۋعا قازاقستان رەسپۋبليكاسىنىڭ 18 جاسقا تولعان ازاماتتارى قاتىسا الادى. قاتىسۋشىلاردىڭ تۇرعىلىقتى جەرىنە، كاسىبي ماماندىعىنا نەمەسە قىزمەت سالاسىنا شەكتەۋ قويىلمايدى. ۇسىنىلاتىن ماتەريالدار قاتىسۋشىنىڭ ءوز اۆتورلىق جۇمىسى بولۋى، بايقاۋ باستالعانعا دەيىن باسقا بايقاۋلاردا جۇلدەلى ورىندارعا يە بولماۋى، سونىمەن قاتار بۇرىن الەۋمەتتىك جەلىلەر مەن بەينەحوستينگتەرگە جۇكتەلمەگەن بولۋى قاجەت. بەينەكونتەنت ۇزاقتىعى – 30 سەكۋندتان 2 مينۋتقا دەيىن.
بايقاۋعا قاتىسۋ ءۇشىن ءوتىنىم مەن بەينەماتەريالداردى aspantaulyalmaty@gmail.com ەلەكتروندى مەكەنجايىنا جىبەرۋ كەرەك.
قاتىسۋعا كەلىپ تۇسكەن جۇمىستاردى شىعارماشىلىق يندۋستريا، مەديا جانە مادەنيەت سالاسىنىڭ ماماندارىنان قۇرالعان ساراپتامالىق كوميسسيا مەن قازىلار القاسى باعالايدى. قازىلار قۇرامىنا رەجيسسەرلەر، پروديۋسەرلەر، مادەنيەت جانە ونەر قايراتكەرلەرى، مەديا سالاسىنىڭ كاسىبي ماماندارى، قوعام جانە بۇقارالىق اقپارات قۇرالدارىنىڭ وكىلدەرى كىرەدى.
جۇمىستاردى باعالاۋ كەزىندە ەڭ الدىمەن اۆتورلىق يدەيانىڭ وزىندىك ەرەكشەلىگىنە، تاقىرىپتى اشۋ تاسىلىنە جانە بەينەماتەريالدىڭ كوركەمدىك شەشىمىنە نازار اۋدارىلادى. سونىمەن قاتار جۇمىستىڭ مازمۇندىق تەرەڭدىگى، ۆيزۋالدى ءتىلى، رەجيسسەرلىك جانە مونتاجدىق شەشىمدەرى، تەحنيكالىق ساپاسى، سونداي-اق كورەرمەنگە ەموسيونالدىق اسەرى ەسكەرىلەدى.
بايقاۋ جەڭىمپازدارى 2026 جىلعى قىركۇيەكتە الماتى قالاسى كۇنىنە ارنالعان ءىس-شارا اياسىندا جاريالانىپ، ماراپاتتالادى.
بايقاۋدىڭ جالپى جۇلدە قورى 7،5 ملن تەڭگەنى قۇرايدى:
* ءى ورىن – 3 000 000 تەڭگە؛
* ءىى ورىن – 2 000 000 تەڭگە؛
* ءىىى ورىن – 1 000 000 تەڭگە؛
* بەس ىنتالاندىرۋ سىيلىعى – 300 000 تەڭگەدەن.
بايقاۋ قورىتىندىسى بويىنشا ۇزدىك دەپ تانىلعان بەينەماتەريالدار ارنايى ىرىكتەلىپ، ۇيىمداستىرۋشىلاردىڭ اقپاراتتىق جانە كوممۋنيكاسيالىق الاڭدارىندا جاريالانادى. جەڭىمپازدار مەن جۇلدەگەرلەر الماتى قالاسى كۇنىنە ارنالعان سالتاناتتى ماراپاتتاۋ راسىمىنە شاقىرىلادى.
«اسپان تاۋلى الماتى!» بايقاۋى قالانى جاڭا قىرىنان كورسەتەتىن اۆتورلىق جۇمىستاردىڭ پايدا بولۋىنا مۇمكىندىك بەرىپ، قازاقستاندىق بەينەكونتەنتتىڭ دامۋىنا ۇلەس قوسۋدى كوزدەيدى. جوبا ارقىلى جاس اۆتورلار مەن تاجىريبەلى شىعارماشىلىق مامانداردىڭ ءوزارا تاجىريبە الماسۋىنا، جاڭا يدەيالاردىڭ قالىپتاسۋىنا جانە الماتىنىڭ مادەني ءارى قالالىق بولمىسىن زاماناۋي ۆيزۋالدى فورماتتا تانىتۋعا جول اشىلادى.
بايقاۋعا قاتىسۋ ءۇشىن تولىق اقپاراتتى تومەندەگى سىلتەمە بويىنشا بىلە الاسىزدار:
https://www.gov.kz/memleket/entities/almaty-madeniet/documents/details/1056278؟lang=kk
