الماتىدا جاستار ساياساتى باسقارماسىنىڭ قولداۋىمەن قالا ۆولونتەرلەرى جاز بويى بارلىق اۋدانداردا تەگىن وتاندىق فيلمدەردى كورسەتىپ، اشىق اسپان استىنداعى ەرەكشە جوبانى جۇزەگە اسىردى. بيىلعى ماۋسىم رەسپۋبليكالىق «تازا قازاقستان» اكسياسى اياسىندا ءوتىپ، ءاربىر كورسەتىلىم الدىندا كورەرمەندەرگە ەكولوگيالىق مادەنيەتتى ارتتىرۋعا باعىتتالعان تۇسىندىرمە جۇمىستارى جۇرگىزىلدى. كەيبىر فيلمدەردەن كەيىن سەنبىلىك شارالارى ۇيىمداستىرىلىپ، جاستار قالا تازالىعىنا ءوز ۇلەسىن قوستى.
ءۇش ايدىڭ ىشىندە 50-دەن استام كينوكورسەتىلىم وتكىزىلىپ، مىڭداعان الماتىلىقتار جاڭا قازاقستاندىق فيلمدەردى تاماشالاۋ مۇمكىندىگىنە يە بولدى.
«ءبىز بۇل جوبانى تەك مادەني دەمالىس رەتىندە عانا ەمەس، جاستاردىڭ ەكولوگيالىق مادەنيەتىن قالىپتاستىرىپ، الەۋمەتتىك جاۋاپكەرشىلىگىن ارتتىراتىن ماڭىزدى الاڭ رەتىندە قابىلدايمىز. كينو ارقىلى قوعامعا وي سالۋعا، جاستاردىڭ بەلسەندىلىگىن ارتتىرۋعا مۇمكىندىك بار. سوندىقتان جوبانى الداعى جىلى دا جالعاستىرۋدى جوسپارلاپ وتىرمىز»، – دەدى الماتى قالاسى جاستار ساياساتى باسقارماسىنىڭ باسشىسى ازيز كاجدەنبەك.
«مەن وسى جوبا اياسىندا ءۇش-تورت رەت فيلم كوردىم. ەڭ كەرەمەتى – جاڭا قازاقستاندىق كارتينالاردى العاشقىلاردىڭ ءبىرى بولىپ كورۋ مۇمكىندىگى بولدى. ءار فيلمنەن كەيىن دوستارىممەن بىرگە تالقىلاپ، جاڭا اسەر الدىق. بۇل تەك كينو ەمەس، ناعىز مادەني كەزدەسۋ ورنىنا اينالدى»، – دەءدى كورسەتىلىمگە قاتىسقان جاس الماتىلىق ايدوس ەرجانوۆ.
ۇيىمداستىرۋشىلاردىڭ ايتۋىنشا، اشىق اسپان استىنداعى كينوكورسەتىلىمدەر تۇرعىنداردىڭ سۇيىكتى مادەني جوباسىنا اينالىپ ۇلگەردى. بۇل باستاما كەلەر جىلى دا جالعاسىن تاۋىپ، قالا تۇرعىندارى مەن قوناقتارىنا جاڭا قازاقستاندىق فيلمدەردى تاماشالاۋعا مۇمكىندىك بەرەدى.
